മുംബൈ:ഇന്ത്യൻ ഏകദിന ക്രിക്കറ്റ് ടീമിന്റെ ക്യാപ്റ്റൻ സ്ഥാനത്തുനിന്ന് മാറ്റുന്ന കാര്യം നേരത്തെ അറിയിച്ചിരുന്നില്ലെന്ന് വിരാട് കോഹ്ലി.ദക്ഷിണാഫ്രിക്കയ്ക്കെതിരായ ഏകദിന പരമ്പരയിൽ കളിക്കുമെന്ന് കോഹ്ലി വ്യക്തമാക്കി. ടീമിൽ നിന്നും വിട്ടുനിൽക്കുന്നില്ലെന്നും ഇന്ത്യൻ ടീമിന് വേണ്ടി എപ്പോൾ വേണമെങ്കിലും കളിക്കാൻ സന്നദ്ധനാണെന്നും കോഹ്ലി കൂട്ടിച്ചേർത്തു.
ദക്ഷിണാഫ്രിക്കൻ പരമ്പരയെ പ്രതീക്ഷയോടെയാണ് കാണുന്നതെന്നും വളരെ ആവേശത്തോടെയാണ് പരമ്പരയ്ക്കായി തയ്യാറെടുക്കുന്നതെന്നും അദ്ദേഹം കൂട്ടിച്ചേർത്തു.ഇന്ത്യൻ ടീമിനായി കളിക്കുക എന്നതിൽ നിന്ന് ഒന്നിനും തന്നെ തടയാനാകില്ല.രോഹിത് ശർമ പരമ്പരയിൽ ഒപ്പമുണ്ടാകില്ല എന്നതിനാൽ അദ്ദേഹത്തിന്റെ പരിചയസമ്പത്ത് ടീമിന് നഷ്ടമാകുമെന്ന് കോഹ്ലി കൂട്ടിച്ചേർത്തു.രോഹിത് ശർമയുമായി യാതൊരുവിധ പ്രശ്നമില്ലെന്നും ഇക്കാര്യം കഴിഞ്ഞ കുറച്ച് വർഷങ്ങളായി താൻ വിശദീകരിച്ച് കൊണ്ടേയിരിക്കുകയാണെന്നും വിശദീകരണം നൽകി മടുത്തെന്നും കോഹ്ലി പറഞ്ഞു.
ഇന്ത്യൻ ടി-20 ടീമിന്റെ ക്യാപ്റ്റൻസി ഒഴിയരുതെന്ന് തന്നോട് ഒരാളും ആവശ്യപ്പെട്ടിട്ടില്ലെന്ന് വിരാട് കോഹ്ലി പറഞ്ഞു.രോഹിത് ശർമയെ ക്യാപറ്റനായി തെരഞ്ഞെടുത്തതിന് ശേഷമാണ് ആ വിവരം ചീഫ് സെലക്ടർമാരും സെലക്ഷൻ അംഗങ്ങളും തന്നെ അറിയിച്ചതെന്നും അതിന് മുന്നോടിയായി ചർച്ച പോലും നടത്തിയില്ലെന്ന് താരം ആരോപിച്ചു.
ടി-20 ടീമിന്റെ നായകസ്ഥാനത്ത് നിന്നും മാറരുതെന്ന് ഗാംഗുലിയോ മറ്റ് ബി.സി.സി.ഐ അംഗങ്ങളോ പറഞ്ഞിട്ടില്ലെന്നും കോഹ്ലി കൂട്ടിച്ചേർത്തു.കഴിഞ്ഞ ദിവസം ഗാംഗുലി പറഞ്ഞ കാര്യങ്ങളെ പൂർണമായും തള്ളിക്കൊണ്ടായിരുന്നു കോഹ്ലിയുടെ പ്രതികരണം.
ക്യാപ്റ്റൻ സ്ഥാനം ഒഴിയരുതെന്ന് ഗാംഗുലി തന്നോടാവശ്യപ്പെട്ടിട്ടില്ലെന്നും കോഹ്ലി വ്യക്തമാക്കി.ടി-20 നായകസ്ഥാനം ഒഴിയരുതെന്ന് താൻ കോഹ്ലിയോട് വ്യക്തിപരമായി ആവശ്യപ്പെട്ടിരുന്നുവെന്നും എന്നാൽ കോഹ്ലി സ്വന്തം ഇഷ്ടപ്രകാരമാണ് നായകസ്ഥാനം ഒഴിഞ്ഞത് എന്നുമായിരുന്നു ഗാംഗുലി കഴിഞ്ഞ ദിവസം പറഞ്ഞത്.
