ന്യൂഡൽഹി : ലോകത്ത് ഏറ്റവുമധികം ആരാധകരുള്ള എട്ടാമത്തെ വ്യക്തിത്വമായി പ്രധാനമന്ത്രി നരേന്ദ്ര മോദി. ആഗോള തലത്തിൽ ഏറ്റവവുമധികം ആരാധകരുള്ള 20 വ്യക്തികങ്ങളുടെ പട്ടികയിലാണ് പ്രധാനമന്ത്രി ഇടം പിടിച്ചത്. 38 രാജ്യങ്ങളിൽ നിന്ന് 42,000 ആളുകളിലായി ഡാറ്റ അനലിറ്റിക്സ് കമ്പനിയായ യൂഗോവ് ആണ് സർവ്വേ നടത്തിയത്. ഈ വർഷം നടത്തിയ സർവ്വേ റിപ്പോർട്ടാണിത്.
ക്രിക്കറ്റ് താരം വിരാട് കോഹ്ലി, ബോളിവുഡിന്റെ സ്വന്തം ബിഗ് ബി അമിതാഭ് ബച്ചൻ, ഷാരൂഖ് ഖാൻ എന്നിവരെ പിന്തള്ളിക്കൊണ്ടാണ് പ്രധാനമന്ത്രി നരേന്ദ്ര മോദി പട്ടികയിൽ ഇടം പിടിച്ചിരിക്കുന്നത്. അമേരിക്കൻ മുൻ പ്രസിഡന്റ് ബറാക് ഒബാമയാണ് പട്ടികയിൽ മുന്നിൽ നിൽക്കുന്നത്.
മൈക്രോസോഫ്റ്റ് സ്ഥാപകൻ ബിൽ ഗേറ്റ്സും, ചൈനീസ് പ്രസിഡന്റ് ഷി ജിൻ പിംഗും ഫുട്ബോൾ താരം ക്രിസ്റ്റിയാനോ റൊണാൾഡോയും ജാക്കി ചാനും പിന്നാലെയുണ്ട്. ടെസ്ല സ്ഥാപകൻ ഇലോൺ മസ്ക് ആറാം സ്ഥാനത്താണ്. ഫുട്ബോളിന്റെ മിശിഹ ലയൺ മെസ്സി ഏഴാം സ്ഥാനത്താണ്. പ്രധാനമന്ത്രി നരേന്ദ്ര മോദിക്ക് പിന്നാലെ റഷ്യൻ പ്രസിഡന്റ് വ്ലാഡിമിർ പുടിനും ആഗോള വ്യവസായിയായ ജാക് മായുമുണ്ട്.
ഏറ്റവുമധികം ആരാധകരുള്ള വനിതാ വ്യക്തിത്വങ്ങളുടെ പട്ടികയും പുറത്തുവിട്ടിട്ടുണ്ട്. ഇന്ത്യയിൽ നിന്നും മൂന്ന് പേരാണ് പട്ടികയിലുള്ളത്. ബോളിവുഡ് താരങ്ങളായ പ്രിയങ്ക ചോപ്ര, ഐശ്വര്യ റായ് ബച്ചൻ, ഇൻഫോസിസ് ചെയർപേഴ്സൺ സുധ മൂർത്തി എന്നിവർക്കാണ് ഏറ്റവുമധികം ആരാധകരുള്ളത്.
ബറാക് ഒബാമയുടെ ഭാര്യ മിഷേൽ ഒബാമയാണ് ഏറ്റവുമധികം ആരാധകരുള്ള വനിതാ വ്യക്തിത്വം. ഹോളിവുഡ് താരം ആൻജലീന ജോളി, എലിസബത്ത് രാജ്ഞി, ഒഫ്ര വിൻഫ്രി, സ്കാർലെറ്റ് ജോഹാൻസൺ, എമ്മ വാട്സൺ എന്നിവരും പട്ടികയിലുണ്ട്.
