പാലങ്ങൾ എപ്പോഴും അൽപം കൗതുകം നിറഞ്ഞ നിർമിതികളിൽ ഒന്നാണ്. പാലത്തിലൂടെ നടക്കാനും വാഹനമോടിക്കാനുമൊക്കെ ഒരു പ്രത്യേക അനുഭൂതിയാണെന്ന് ആളുകൾ പറയാറുണ്ട്. തോടിനെ കവച്ചുവെയ്ക്കുന്ന പാലങ്ങൾ മുതൽ വലിയ നദികളെയും തടാകങ്ങളെയും സമുദ്രത്തെയുമെല്ലാം മറികടക്കുന്ന പാലങ്ങൾ ഇന്ന് ലോകത്തുണ്ട്. തൂക്കുപാലങ്ങൾ മുതൽ കണ്ണാടിപ്പാലം വരെ.. എന്നാൽ നിർമിതി മൂലം ലോകപ്രശസ്തമായ ഒരു പാലമുണ്ട് ജപ്പാനിൽ. ഏറ്റവും ഭീതിജനകമായ പാലമെന്ന് പലരും വിശേഷിപ്പിക്കുന്ന എഷിമ ഒഹാഷിയെന്ന പാലമാണത്.
ലോകത്തിന്റെ നാനാഭാഗത്ത് നിന്നുള്ള വിനോദസഞ്ചാരികളെ ആകർഷിക്കുന്ന ഈ പാലത്തിന് എന്താണ് പ്രത്യേകതയെന്ന് ഒറ്റ ചിത്രത്തിൽ നിന്നു തന്നെ വ്യക്തമാകും. കുത്തനെ നിർമിച്ച് വച്ചിരിക്കുകയാണെന്ന് ആരും ചിന്തിച്ചുപോകുന്ന തരത്തിലാണ് പാലത്തിന്റെ നിർമിതി. ജപ്പാനിന്റെ എഞ്ചിനീയറിങ് വൈദഗ്ധ്യമെന്ന് വിശേഷിപ്പിക്കുന്ന ഈ പാലത്തിന്റെ ദൃശ്യങ്ങൾ കാണുന്ന ഏതൊരാളും ഒറ്റയടിക്ക് ചിന്തിച്ച് പോകുന്ന ചില കാര്യങ്ങളുമുണ്ട്. പാലത്തിലൂടെ സഞ്ചരിക്കുമ്പോൾ ട്രാഫിക് ജാമുണ്ടായാൽ എന്തുചെയ്യുമെന്നാണ് ഭൂരിഭാഗം പേരും ചിന്തിച്ച് ആകുലപ്പെടാറുള്ളത്. ഈ പാലം കേറുന്നവന്റെ ധൈര്യം അപാരം തന്നെയെന്ന് കരുതുന്നവരുമുണ്ട്. ആദ്യ കാഴ്ചയിൽ നേരെ ആകാശത്തേക്ക് പോയി പെട്ടെന്ന് താഴേക്ക് പതിക്കുന്ന പാലമെന്നാണ് തോന്നുക. കാരണം, പാലത്തിന്റെ കുത്തനെയുള്ള ചെരിവ് കണ്ടാൽ ആരും പകച്ചുപോകുമെന്ന് ചുരുക്കം.
എന്നാൽ ഇിതിന് പിന്നിൽ ഒരു വസ്തുതയുണ്ട്. പാലം ആദ്യമായി കാണുന്നവർ ഒന്ന് ഞെട്ടുമെങ്കിലും ഇതിലൂടെ സഞ്ചരിക്കുമ്പോൾ ഭയപ്പെടേണ്ടതായി അവിടെ ഒന്നും തന്നെയില്ല. അതായത് പാലത്തിന്റെ ഭീകരത തോന്നിപ്പിക്കുന്നത് ആ പാലം നോക്കികാണുന്ന ചില ആംഗിളുകളാണ്. പാലത്തിന്റെ ഒരു വശത്ത് നിന്നുള്ള കാഴ്ച മാത്രമാകുമ്പോഴാണ് കുത്തനെ നിർമിച്ചതാണെന്ന് തോന്നിക്കുന്നത്. ഫോട്ടോകളിൽ മാത്രമാണ് ഈ ഭീകരത. വാഹനങ്ങൾ റോഡിൽ നിന്നും പാലത്തിലേക്ക് പ്രവേശിക്കുമ്പോഴുള്ള കയറ്റമാണ് ഒരു വശത്തുനിന്നും നോക്കുമ്പോൾ കുത്തനെയായി തോന്നുന്നത്. യഥാർത്ഥത്തിൽ ഈ പേടിപ്പെടുത്തുന്ന കയറ്റിറക്കങ്ങൾ പാലത്തിനില്ല. അതുകൊണ്ടുതന്നെ പാലങ്ങളിലൂടെ കടന്നുപോകാൻ ഡ്രൈവർമാർ പേടിക്കേണ്ട കാര്യമില്ല. ടെലിഫോട്ടോ ലെൻസ് ഉപയോഗിച്ച് പ്രത്യേക കോണിൽ നിന്നുമെടുക്കുന്ന പാലത്തിന്റെ ചില പേടിപ്പെടുത്തുന്ന ചിത്രങ്ങൾ വ്യാപകമായാണ് ഇന്റർനെറ്റിൽ പ്രചരിച്ചിക്കുന്നത്.
ജപ്പാനിലെ ഏറ്റവും വലിയ ഫ്രെയിം പാലവും ലോകത്തിലെ മൂന്നാമത്തെ വലിയ പാലവുമാണ് എഷിമ ഒഹാഷി. ‘റോളർ കോസ്റ്റർ ബ്രിഡ്ജ്’ എന്ന ഇരട്ടപേരും ഈ പാലത്തിനുണ്ട്. പ്രത്യേക ഫ്രെയിം ഘടന മൂലം യഥാർത്ഥത്തിൽ ഉള്ളതിനേക്കാൾ ചെരിവ് പാലത്തിന്റെ ഇരുവശങ്ങളിലെയും കാഴ്ചയിൽ തോന്നുന്നതിനാലാണ് ‘റോളർകോസ്റ്റർ’ എന്ന പേര് ലഭിച്ചത്. ജപ്പാനിലെ നകൗമി തടാകത്തിന് കുറുകെ മാറ്റ്സ്യൂ നഗരത്തെ സകൈമിനാറ്റോ നഗരവുമായി ബന്ധിപ്പിക്കുന്നതാണ് പാലം. കപ്പലുകൾക്കും മറ്റും കടന്നുപോകാനുള്ള സൗകര്യാർത്ഥമാണ് പാലം ഇത്രയേറെ ഉയരത്തിൽ നിർമിച്ചത്.
രണ്ട് വരി പാതയിൽ ക്രമീകരിച്ചിരിക്കുന്ന പാലത്തിന് 1.7 കിലോമീറ്റർ നീളവും 11.4 മീറ്റർ വീതിയുമാണ്. 1997ൽ നിർമാണമാരംഭിച്ച എഷിമ ഒഹാഷിയുടെ പണികൾ 2004ലാണ് പൂർത്തിയായത്. ഒരു വിനോദ സഞ്ചാര കേന്ദ്രം കൂടിയായി മാറിയ പാലത്തിൽ വണ്ടിയോടിക്കാൻ ആഗ്രഹിച്ച് എത്തുന്നവരാണ് അധികവും. പാലത്തിന് മേൽ അനുവദനീയമായ പരമാവധി വേഗത 40 കിലോമീറ്ററാണ്. ഇതാണ് ലോകത്തിലെ ഏറ്റവും പേടിപ്പെടുത്തുന്ന പാലമെന്ന് വിശേഷിപ്പിക്കുന്ന എഷിമ ഒഹാഷിയുടെ പിന്നിലെ വസ്തുതകൾ.
