ശബരിമല: മകരവിളക്ക് ഉത്സവത്തിനായി ശബരിമല നട തുറന്നു. വൈകിട്ട് അഞ്ച് മണിക്കാണ് മേൽശാന്തി ദീപം തെളിയിച്ച് നട തുറന്നത്. പിന്നീട് ആഴിയിലും ദീപം പകർന്നു.
വെളളിയാഴ്ച (നാളെ) പുലർച്ചെ 4 മണി മുതലാണ് ഭക്തരെ ദർശനത്തിനായി മല കയറ്റി വിടുക. ഇന്ന് ഭക്തർക്ക് പ്രവേശനമില്ല. ഇന്ന് രാവിലെ മുതൽ സ്പോട്ട് ബുക്കിംഗ് സെന്ററിന്റെ പ്രവർത്തനം ആരംഭിച്ചിരുന്നു.
മണ്ഡലപൂജയ്ക്ക് ശേഷം കഴിഞ്ഞ ദിവസം വൈകിട്ടാണ് നട അടച്ചത്. 11 ലക്ഷത്തിലധികം തീർത്ഥാടകരാണ് ഇത്തവണ സന്നിധാനത്തെത്തിയത്. വരുമാനം 90 കോടി പിന്നിട്ടതായി ദേവസ്വം ബോർഡ് വ്യക്തമാക്കിയിരുന്നു. കഴിഞ്ഞ വർഷത്തെ മണ്ഡലകാലത്ത് 8 കോടി മാത്രമായിരുന്നു വരുമാനം. കൊറോണ നിയന്ത്രണങ്ങൾ ഇല്ലാതിരുന്ന 2019 ൽ മണ്ഡല, മകര വിളക്കുകാലത്തെ വരുമാനം 156 കോടിയായിരുന്നു.
മണ്ഡലകാലത്തിന്റെ തുടക്കത്തിൽ ഉണ്ടായിരുന്ന കൊറോണ നിയന്ത്രണങ്ങളിൽ പിന്നീട് ഇളവുവരുത്തിയതോടെ സന്നിധാനത്ത് തിരക്കേറിയിരുന്നു. മകരവിളക്ക് ഉത്സവത്തിനും കൂടുതൽ ഭക്തർ എത്തുമെന്ന പ്രതീക്ഷയിലാണ് ദേവസ്വം ബോർഡ്. ജനുവരി 14നാണ് മകരവിളക്ക് മഹോത്സവം.
Comments