ന്യൂഡൽഹി ; രാജ്യത്ത് മൂന്നാം തരംഗം ആരംഭിക്കുന്നതിന്റെ സൂചനയായി പ്രതിദിന രോഗികളുടെ എണ്ണത്തിൽ വൻ വർദ്ധനവ്. കഴിഞ്ഞ 24 മണിക്കൂറിനിടെ നടത്തിയ പരിശോധനയിൽ 1,17,100 പേർക്ക് രോഗം സ്ഥിരീകരിച്ചു. 302 മരണവും റിപ്പോർട്ട് ചെയ്തിട്ടുണ്ട്.
ഇതോടെ രാജ്യത്തിന്റെ വിവിധ ഭാഗങ്ങളിലായി ചികിത്സയിൽ കഴിയുന്നവരുടെ എണ്ണം 3,71,363 ആയിരിക്കുകയാണ്. 30,836 പേർ കഴിഞ്ഞ ദിവസം രോഗമുക്തി നേടി. 3,43,71,845 ആളുകൾ ഇതുവരെ രോഗമുക്തി നേടി.
അതേസമയം കൊറോണ ബാധിച്ച് മരിച്ചവരുടെ എണ്ണം 4,83,178 ആയി. ഒന്നിൽ താഴെയായിരുന്ന പ്രതിദിന പോസിറ്റീവിറ്റി നിരക്ക് 7.74 ശതമാനമായെന്നും കേന്ദ്ര ആരോഗ്യമന്ത്രാലയം അറിയിച്ചു. ആകെ 149.66 കോടി വാക്സിൻ ഡോസുകൾ രാജ്യത്ത് ഇതുവരെ വിതരണം ചെയ്തിട്ടുണ്ടന്നാണ് കണക്ക്.
ഇതിനിടെ രാജ്യത്തെ ഒമിക്രോൺ ബാധിതരുടെ എണ്ണം 3007 ആയി. 876 രോഗികളുള്ള മഹാരാഷ്‌ട്രയാണ് ഏറ്റവും കൂടുതൽ ഒമിക്രോൺ ബാധിതരുള്ള സംസ്ഥാനം. പട്ടികയിൽ രണ്ടാം സ്ഥാനത്ത് ഡൽഹിയാണ്. ഇവിടെ 465 പേർ ഇതുവരെ റിപ്പോർട്ട് ചെയ്തു. അഞ്ചാം സ്ഥാനമാണ് കേരളത്തിനുള്ളത്. 284 പേർക്ക് ഇതുവരെ ഒമിക്രോൺ സ്ഥിരീകരിച്ചിട്ടുണ്ട്.
കൊറോണ രോഗികളുടെ എണ്ണം ഉയരുന്ന പശ്ചാത്തലത്തിൽ രാജ്യത്തെ ആരോഗ്യപ്രവർത്തകരുമായി പ്രധാനമന്ത്രി ഇന്ന് സംസാരിക്കും. വൈകിട്ട് നാല് മണിക്ക് വെർച്വൽ യോഗമാകും നടക്കുക.
