ആലപ്പുഴ: വർഗ്ഗീയ കലാപത്തിന് സമൂഹമാദ്ധ്യമങ്ങളിലൂടെ സന്ദേശങ്ങൾ പ്രചരിപ്പിച്ച കേസിൽ ഒരു പോപ്പുലർ ഫ്രണ്ടുകാരൻ കൂടി അറസ്റ്റിൽ. പ്രയാർ വടക്ക് മുറിയിൽ കണ്ണമത്ത് കിഴക്ക് വീട്ടിൽ ഹർഷാദാണ് (35)അറസ്റ്റിലായത്. കായംകുളം പോലീസിന്റേതാണ് നടപടി. ഹർഷാദിന്റെ മൊബൈൽ ഫോൺ പോലീസ് പിടിച്ചെടുത്തു.
ഫേസ്ബുക്ക് പ്രൊഫൈൽ വഴി വിദ്വേഷകരമായ വാചകങ്ങൾ പോസ്റ്റ് ചെയ്ത് പ്രചരിപ്പിച്ച് സമൂഹത്തിൽ പരസ്പര ലഹള ഉണ്ടാക്കുന്നതിന് ശ്രമിക്കുകയായിരുന്നു ഹർഷാദ്. ആലപ്പുഴയിൽ ബിജെപി, എസ്ഡിപിഐ നേതാക്കളുടെ കൊലപാതകത്തിന് പിന്നാലെയാണിത്. പിടിച്ചെടുത്ത മൊബൈൽ ഫോൺ ഫോറെൻസിക് ലാബിൽ അയച്ച് ശാസ്ത്രീയ പരിശോധന നടത്തി.
ജില്ലയിലെ സമൂഹമാദ്ധ്യമ പ്രൊഫൈലുകൾ പോലീസിന്റെ നിരീക്ഷണത്തിലാണ്. മതസൗഹാർദ്ദം തകർക്കുന്ന പ്രചരണം നടത്തുന്ന വ്യക്തികളും സംഘടനകളും സൈബർ പോലീസിന്റെ നിരീക്ഷണത്തിലാണ്. പ്രകോപനപരമായ സന്ദേശങ്ങൾ പ്രചരിപ്പിച്ചാൽ കടുത്ത നടപടികൾ ഉണ്ടാകുമെന്ന് ജില്ലാ പോലീസ് മേധാവി ജി ജയ്ദേവ് അറിയിച്ചു.
