ന്യൂഡൽഹി: ഇന്ത്യൻ സമ്പദ്വ്യവസ്ഥ നടപ്പ് സാമ്പത്തിക വർഷം 8.3 ശതമാനവും 2022-23 സാമ്പത്തിക വർഷത്തിൽ 8.7 ശതമാനവും വളർച്ച കൈവരിക്കുമെന്ന് ലോകബാങ്ക്. ചൊവ്വാഴ്‌ച്ച പുറത്തിറക്കിയ ‘ഗ്ലോബൽ ഇക്കണോമിക് പ്രോസ്പെക്ട്സ്’ റിപ്പോർട്ടിലാണ് ലോകബാങ്ക് ഇക്കാര്യം വ്യക്തമാക്കുന്നത്. 2021 ഒക്ടോബറിൽ പുറത്തിറക്കിയ അവസാന പ്രൊജക്ഷനിൽ ലോകബാങ്ക് പ്രസ്താവിച്ചതിന് സമാനമാണ് പുതിയ വളർച്ചാ പ്രവചനവും
ഗ്ലോബൽ ഇക്കണോമിക് പ്രോസ്പെക്ട്സ് റിപ്പോർട്ട് അനുസരിച്ച്, നിലവിലെയും അടുത്ത സാമ്പത്തിക വർഷത്തിലെയും ഇന്ത്യൻ സമ്പദ്വ്യവസ്ഥയുടെ വളർച്ചാ നിരക്ക് അതിന്റെ തൊട്ടടുത്ത അയൽരാജ്യങ്ങളെ അപേക്ഷിച്ച് കൂടുതൽ ശക്തമാകും.
നടപ്പ് സാമ്പത്തിക വർഷത്തലും അടുത്ത സാമ്പത്തികവർഷത്തിവലും ബംഗ്ലാദേശ് യഥാക്രമം 6.4, 6.9 ശതമാനം വളർച്ച പ്രതീക്ഷിക്കുന്നതായി റിപ്പോർട്ടിൽ പറയുന്നു. നേപ്പാൾ ഈ സാമ്പത്തിക വർഷം 3.9 ശതമാനവും അടുത്ത സാമ്പത്തിക വർഷത്തിൽ 4.7 ശതമാനവും, പാക്കിസ്താൻ 22 സാമ്പത്തിക വർഷത്തിൽ 3.4 ശതമാനവും, 2023 സാമ്പത്തിക വർഷത്തിൽ 4 ശതമാനവും വളർച്ച നേടുമെന്ന് പ്രവചിക്കുന്നു.
ലോകബാങ്ക് റിപ്പോർട്ട് അനുസരിച്ച്, ആഗോള സാമ്പത്തിക വളർച്ച ഈ വർഷം കൊറോണ മഹാമാരിയുടെ പശ്ചാത്തലത്തിലും വിതരണ ശൃംഖലയിലെ തടസ്സങ്ങളും നിലനിൽക്കുന്നതിനാലും പ്രകടമായി കുറയും. വാഷിംഗ്ടൺ ആസ്ഥാനമായുള്ള ഡെവലപ്മെന്റ് ലെൻഡർ, ആഗോള വളർച്ച 2021ലെ 5.5 ശതമാനത്തിൽ നിന്ന് ഈ വർഷം 4.1 ശതമാനമായി കുറയുമെന്ന് പ്രവചിക്കുന്നു. എന്നാൽ ‘ഒമിക്റോണുമായി ബന്ധപ്പെട്ട സാമ്പത്തിക തടസ്സങ്ങൾ വളർച്ചയെ ഗണ്യമായി കുറയ്‌ക്കും’ എന്ന് മുന്നറിയിപ്പ് നൽകി 3.4 ശതമാനമായി കുറച്ചു.
എന്നാൽ ഇന്ത്യയെ സംബന്ധിച്ചെടുത്തോളം ലോകബാങ്ക് പ്രവചനങ്ങൾ പകർച്ചവ്യാധിക്ക് ശേഷമുള്ള വീണ്ടെടുക്കലിനെ സൂചിപ്പിക്കുന്നു. 21-22 സാമ്പത്തിക വർഷത്തിലെ ഇന്ത്യയുടെ യഥാർത്ഥ ജിഡിപി വളർച്ച 7.5 മുതൽ 12.5 ശതമാനം വരെയാകുമെന്ന് മാർച്ച് 31ന് ബാങ്ക് അറിയിച്ചു. ഈ സാമ്പത്തിക വർഷത്തിൽ 9.2ശതമാനം വളർച്ചയാണ് കേന്ദ്രസർക്കാർ കണക്കാക്കുന്നത്. ജനുവരി 8 ന് സ്റ്റാറ്റിസ്റ്റിക്‌സ് ആൻഡ് പ്രോഗ്രാം ഇംപ്ലിമെന്റേഷൻ മന്ത്രാലയം പുറത്തിറക്കിയ ആദ്യ മുൻകൂർ എസ്റ്റിമേറ്റ് അനുസരിച്ച് ഈ സാമ്പത്തിക വർഷത്തിൽ ഇന്ത്യയുടെ ജിഡിപി 9.2 ശതമാനം വളരുമെന്ന് പ്രവചിക്കുന്നു.
നടപ്പ് സാമ്പത്തിക വർഷത്തിൽ ജിഡിപി വളർച്ചാ നിരക്ക് 9.5 ശതമാനമായിരിക്കുമെന്ന് ഡിസംബറിൽ പറഞ്ഞിരുന്ന റിസർവ് ബാങ്ക് ഓഫ് ഇന്ത്യയുടെ (ആർബിഐ) പ്രവചനത്തേക്കാൾ കുറവാണിത്. സാമ്പത്തിക വർഷത്തിലെ 9.2 ശതമാനം ജിഡിപി വളർച്ചാ നിരക്ക് 17 വർഷത്തിനിടയിലെ ഏറ്റവും ഉയർന്നതണ്. കൊറോണ കാരണം 20-21 സാമ്പത്തിക വർഷത്തിൽ ജിഡിപി 7.3 ശതമാനം ചുരുങ്ങിയിരുന്നു.
