കൊറോണ ; ഖത്തറിൽ നിലവിലുള്ള നിയന്ത്രണങ്ങൾ തുടരും

ദോഹ: ഖത്തറിൽ നിലവിലുള്ള കൊറോണ നിയന്ത്രണങ്ങൾ തുടരാൻ മന്ത്രിസഭായോഗം തീരുമാനിച്ചു. പ്രധാനമന്ത്രി ഷെയ്ഖ് ഖാലിദ് ബിൻ ഖലീഫ ബിൻ അബ്ദുൽ അസീസ് അൽതാനിയുടെ അദ്ധ്യക്ഷതയിൽ അമീരി ദീവാനിൽ ചേർന്ന പ്രതിവാര മന്ത്രിസഭായോഗമാണ് ഇതു സംബന്ധിച്ച തീരുമാനം കൈക്കൊണ്ടത്. നിലവിലെ സ്ഥിതിഗതികളും മുൻകരുതൽ നടപടികളും പൊതുജനാരോഗ്യ മന്ത്രി യോഗത്തിൽ വിശദീകരിച്ചു.

അതേസമയം കഴിഞ്ഞ 24 മണിക്കൂറിനിടെ 4,187 പേർക്കാണ് രോഗം സ്ഥിരീകരിച്ചത്. ഇതിൽ 3,748 പേർ ഖത്തർ നിവാസികളും 439 പേർ യാത്രക്കാരുമാണ്. ഇതോടെ ആകെ രോഗികളുടെ എണ്ണം 34,775 ആയി ഉയർന്നു. 1,123 പേരാണ് ഇന്ന് രോഗമുക്തി നേടിയത്. രണ്ടു മരണങ്ങൾ കൂടി റിപ്പോർട്ട് ചെയ്തതോടെ ആകെ മരണങ്ങൾ 623 ആയി. 84 വയസ്സുള്ള രണ്ടു രോഗികളാണ് മരിച്ചത്.