കോഴിക്കോട് :പ്രണയബന്ധത്തിലെ വ്യക്തിസ്വാതന്ത്ര്യത്തെ കുറിച്ച് അജ്ഞരായ യുവതലമുറയാണ് വളര്ന്നു വരുന്നതെന്ന് സംസ്ഥാന വനിതാ കമ്മീഷന് ചെയര്പേഴ്സണ് അഡ്വ:പി സതീദേവി. സമീപകാലസംഭവങ്ങൾ തെളിയിക്കുന്നത് ഇതാണെന്ന് സതീദേവി വ്യക്തമാക്കി.
പ്രണയബന്ധത്തില്നിന്ന് പിന്മാറുന്ന വ്യക്തിയെ സ്വഭാവഹത്യ ചെയ്യുന്ന തരത്തില് സമൂഹമാധ്യമങ്ങളിലൂടെയുംമറ്റും അധിക്ഷേപിക്കുന്ന പ്രവണതയും ഏറിവരികയാണ്.പ്രണയത്തില് നിന്ന് പിന്മാറുന്ന പങ്കാളിയെ ഇല്ലാതാക്കുന്ന നിരവധി സംഭവങ്ങള് സംസ്ഥാനത്ത് റിപ്പോര്ട്ടു ചെയ്തു.വ്യക്തിസ്വാതന്ത്ര്യത്തെ മാനിക്കാന് പരിശീലിക്കുക എന്നത് എല്ലാ ബന്ധങ്ങളിലും അത്യന്താപേക്ഷിതമാണെന്ന് കമ്മീഷന് അഭിപ്രായപ്പെട്ടു.
തൊഴിലിടങ്ങളില് സ്ത്രീകള്ക്കെതിരെയുണ്ടാകുന്ന ലൈംഗികാതിക്രമങ്ങള് തടയുന്നതിന് ഓരോ സ്ഥാപനത്തിലും ഇന്റേണല് കംപ്ലൈന്റ്റ് കമ്മിറ്റി ഉണ്ടായിരിക്കണമെന്ന നിബന്ധന പാലിക്കപ്പെടുന്നില്ലെന്നും സതീ ദേവി അഭിപ്രായപ്പെട്ടു.സ്ഥാപനത്തിലെ ജീവനക്കാരുടെ പരാതി പരിഹരിക്കാനുള്ള അവസരമൊരുക്കാന് തൊഴിലുടമകള്ക്കും മാനേജ്മെന്റിനും ബാധ്യതയുണ്ടെന്നും സതീദേവി കൂട്ടിച്ചേർത്തു.
