രാത്രിയിൽ ഉറക്കമില്ലാത്തവർക്ക് ഒരു സന്തോഷ വാർത്ത. നിങ്ങളെ കാത്തിരിക്കുന്നത് മണിക്കൂറിന് 18,000 രൂപ വരെ ലഭിച്ചേക്കാവുന്ന ഉഗ്രനൊരു തൊഴിലാണ്. നല്ല ഉറക്കമുള്ളവർക്ക് പോലും തങ്ങളുടെ ഉറക്കം ഉപേക്ഷിക്കാൻ തോന്നുന്ന ഈ ഓഫർ മുന്നോട്ട് വെച്ചിരിക്കുന്നത് ഒരു കിടക്ക കമ്പനിയാണ്. ഉറക്കം കുറവുള്ളവരിൽ ഒരു പരീക്ഷണം നടത്തുകയാണ് ഇവരുടെ ലക്ഷ്യം.
മാട്രെസ് റിവ്യു കമ്പനിയായ സ്ലീപ് ജംഗിയാണ് ഈ ജോലി നൽകുന്നത്. ഇവർ നൽകുന്ന കിടക്കയും കണ്ണിലിടുന്ന മാസ്കും തലയിണയും ഉപയോഗിക്കണം. ഇവ ധരിച്ച് കമ്പനി ആവശ്യപ്പെടുന്ന വിവരങ്ങൾ നിങ്ങൾ പങ്കുവെക്കുന്നതിനാണ് പ്രതിഫലം നൽകുന്നത്. മണിക്കൂറിന് 250 ഡോളർ വരെ ലഭിച്ചേക്കാമെന്നും കമ്പനി പറയുന്നു.
പ്രധാനമായും എട്ട് ഉൽപ്പന്നങ്ങളാണ് ഉറക്കം കുറവുള്ളവരിൽ പരീക്ഷിക്കുന്നത്. രണ്ട് മാസക്കാലമാണ് ഇത് നടത്തുക. ഓരോ ആഴ്ചയും ഓരോ ഉൽപ്പന്നങ്ങളുടെ പരീക്ഷണത്തിന് വിധേയരാകേണ്ടി വരും. പ്രത്യേക ആപ്ലിക്കേഷനുകൾ വഴിയാണ് ഇത്തരക്കാരിൽ നിന്നും വിവരം ശേഖരിക്കുക. എട്ട് വ്യത്യസ്ത ഉൽപ്പന്നങ്ങൾ ഉപയോഗിക്കുമ്പോഴുള്ള മാറ്റങ്ങൾ ഇതിൽ റെക്കോർഡ് ചെയ്യപ്പെടും. പരീക്ഷണം പൂർത്തിയാകുമ്പോൾ ആകെ രണ്ടായിരം ഡോളർ ലഭിക്കുമെന്നും സ്ലീപ് ജംഗി പറയുന്നു.
ഇതിനായി ഉറക്കക്കുറവുള്ളവർ ചെയ്യേണ്ടത് ഇത്രമാത്രമാണ്. ഈ ജോലിക്ക് നിങ്ങൾ എന്തുകൊണ്ട് യോഗ്യരാണെന്ന് തോന്നുന്നു എന്ന കാര്യം ഒരു കുറിപ്പായി എഴുതി അപേക്ഷിക്കുക. നല്ല ഉറക്കമുള്ളവർ അപേക്ഷിക്കേണ്ടതില്ലെന്ന് കമ്പനി പ്രത്യേകം എടുത്ത് പറയുന്നുണ്ട്.
ഉറക്കം കുറവുള്ളവർക്ക് ആകർഷണീയമായി തോന്നാവുന്ന ഈ ഓഫറിന് ചില മുന്നറിയിപ്പുകളും കമ്പനി നൽകുന്നുണ്ട്. പരീക്ഷണത്തിന് വിധേയമാകുന്നതിലൂടെ നിങ്ങളുടെ ഉറക്കം കൂടുതൽ സങ്കീർണമാകാനുള്ള സാധ്യതയുണ്ടെന്നാണ് വിലയിരുത്തൽ. എങ്കിലും ഇതൊന്നും ഒരു വിഷയമല്ലാത്ത 21 വയസ് പൂർത്തിയായവർക്ക് സ്ലീപ് ജംഗിയുടെ വെബ്സൈറ്റിൽ കയറി തൊഴിലിനായി അപേക്ഷിക്കാം. ഫെബ്രുവരി 14 വരെ അപേക്ഷകൾ സ്വീകരിക്കുമെന്ന് സ്ലീപ് ജംഗി വ്യക്തമാക്കിയിട്ടുണ്ട്.
Comments