സുഭാഷ് ചന്ദ്രബോസിന്റെ ജന്മദിനം: വിപ്ലവകാരിയായ നേതാജിയെക്കുറിച്ച് അറിഞ്ഞിരിക്കേണ്ട രസകരമായ ഒന്‍പത് കാര്യങ്ങള്‍

ന്യൂഡല്‍ഹി: ഇന്ത്യയുടെ സ്വാതന്ത്ര്യ സമരത്തിന് മഹത്തായ സംഭാവന നല്‍കിയ ദേശീയവാദി സുഭാഷ് ചന്ദ്രബോസ്1897 ജനുവരി 23 ന് കട്ടക്കില്‍ ജനിച്ചു. ഭാരത മാതാവിന്റെ ഈ ധീരപുത്രനെ രാജ്യം നേതാജി എന്ന് ഓമനപ്പേരില്‍ വിളിച്ചു.

മാതൃരാജ്യത്തിന്റെ വീരനായകന്‍ ബ്രിട്ടീഷ് ഭരണത്തിന്റെ ഇരുണ്ട നാളുകളില്‍ ജനങ്ങളില്‍ ദേശീയതയുടെ ചൈതന്യം നിറച്ചു. ഇന്ത്യാ ഗേറ്റില്‍ നേതാജിയുടെ പ്രതിമ സ്ഥാപിക്കുമെന്ന് രണ്ട് ദിവസം മുമ്പ് കേന്ദ്രം പ്രഖ്യാപിച്ചിരുന്നു. പ്രതിമ നിര്‍മിക്കുന്നത് വരെ ബോസിന്റെ ഹോളോഗ്രാം പ്രതിമസ്മാരകത്തില്‍ സ്ഥാപിക്കും. കഴിഞ്ഞ വര്‍ഷം മുതല്‍ അദ്ദേഹത്തിന്റെ ജന്മദിനം ‘പരാക്രം ദിവസ്’ ആയി ആഘോഷിക്കാന്‍ കേന്ദ്രം തീരുമാനിച്ചിരുന്നു. നേതാജിയെക്കുറിച്ചുള്ള ഒന്‍പത് രസകരമായ വസ്തുതകള്‍ ചുവടെ:

1) പഠനത്തില്‍മിടുക്കനായ സുഭാഷ് ചന്ദ്രബോസ് ഇന്ത്യന്‍ സിവില്‍ സര്‍വീസസ് പരീക്ഷ പാസായി. എന്നിട്ടും, ബ്രിട്ടീഷ് സാമ്രാജ്യത്വ ഭരണത്തിന്‍ കീഴില്‍ ജോലി ചെയ്യാന്‍ ആഗ്രഹിക്കാത്തതിനാല്‍ അദ്ദേഹം ICS ജോലി ഉപേക്ഷിച്ചു.
2)ബംഗാളിലെ രാഷ്‌ട്രീയ നേതാവായ ചിത്തരഞ്ജന്‍ ദാസിന്റെ ഉടമസ്ഥതയിലുള്ള ഫോര്‍വേഡ് പത്രത്തിന്റെ എഡിറ്ററായി സുഭാഷ് ചന്ദ്രബോസ് പ്രവര്‍ത്തിച്ചു. പിന്നീട് അദ്ദേഹം സ്വരാജ് എന്ന സ്വന്തം പത്രം തുടങ്ങി. ഇന്ത്യന്‍ സ്ട്രഗിള്‍ എന്ന പേരില്‍ ഒരു പുസ്തകം പ്രസിദ്ധീകരിച്ചു.
3)സുഭാഷ് ചന്ദ്രബോസ് ‘ജയ് ഹിന്ദ്’ മുദ്രാവാക്യം ഉണ്ടാക്കി.
ഇതിനു പുറമെ അദ്ദേഹം ‘ദില്ലി ചലോ’, ‘തും മുജെ ഖൂന്‍ ദോ, മേം തുംഹേ ആസാദി ദുംഗ’ എന്നീ കാഹളധ്വനികളും സമ്മാനിച്ചു.
4) രവീന്ദ്രനാഥ ടാഗോറിന്റെ ‘ജനഗണമന’ സ്വതന്ത്ര ഇന്ത്യയ്‌ക്കുവേണ്ടി ദേശീയഗാനമായി തിരഞ്ഞെടുത്തതും സുഭാഷ് ചന്ദ്രബോസാണ്.
5) 1942-ല്‍ സുഭാഷ് ചന്ദ്രബോസ് ജര്‍മ്മനിയില്‍ ആസാദ് ഹിന്ദ് റേഡിയോ ആരംഭിച്ചു.
6)കൊളോണിയലിസത്തെ ഉന്മൂലനം ചെയ്യാന്‍ ആര്‍ജ്ജവത്തോടെ ഇറങ്ങിയ സുഭാഷ് ചന്ദ്രബോസ്, സ്വാതന്ത്ര്യസമര കാലത്ത് ഒരേ സമയം മഹാത്മാഗാന്ധിയുടെ സഖ്യകക്ഷിയും എതിരാളിയും ആയിത്തീര്‍ന്നിട്ടുണ്ട്. ഇതാണ് ഒരു പക്ഷെ ഏറ്റവും പ്രസക്തമായ കാര്യവും.
7) ബ്രിട്ടീഷുകാര്‍ വിപ്ലവകാരിയായ ഈ വീരപുത്രനെ പല തവണ അറസ്റ്റു ചെയ്യുകയും മോചിപ്പിക്കുകയും വീണ്ടും അറസ്റ്റ് ചെയ്യുകയും ചെയ്തു.
8)സുഭാഷ് ചന്ദ്രബോസിന്റെ നേതൃത്വത്തില്‍  ഇന്ത്യന്‍ നാഷണല്‍ ആര്‍മിയുടെ (ഐഎന്‍എ) സൈനികര്‍, ബ്രിട്ടീഷുകാരില്‍നിന്ന് ഇന്ത്യയെ മോചിപ്പിക്കാന്‍ മാതൃരാജ്യത്തിന് വേണ്ടി ജീവന്‍ ബലിയര്‍പ്പിച്ചു.
9 )സുഭാഷ് ചന്ദ്രബോസിന്റെ മരണം ഇന്നുംദുരൂഹതമാണ്. 1945 ഓഗസ്റ്റ് 18-ന് തായ്പേയില്‍ നടന്ന ഒരു ജാപ്പനീസ് വിമാനാപകടത്തില്‍ അദ്ദേഹം മരിച്ചുവെന്ന് അഭ്യൂഹം. വിവരാവകാശ പ്രകാരം ചോദിച്ചതിന് മറുപടിയായി കേന്ദ്രം ഇക്കാര്യം സ്ഥിരീകരിച്ചുവെങ്കിലും ദുരൂഹത ബാക്കിയാണ്.