ന്യൂഡൽഹി:കശ്മീരിൽ ഏറ്റുമുട്ടലിൽ വീരമൃത്യു വരിച്ച മലയാളി സൈനികൻ നായിബ് സുബൈദാർ എം ശ്രീജിത്തിന് ശൗര്യചക്ര. കോഴിക്കോട് സ്വദേശിയാണ് എം ശ്രീജിത്ത്. 12 പേർക്കാണ് ശൗര്യചക്ര നൽകി രാജ്യം ആദരമർപ്പിക്കുന്നത്.
മലയാളിയായ ആർ ആർ ശരത്തിന് മരണാനന്തര ബഹുമതിയായി സർവ്വോത്തം ജീവൻ രക്ഷാ പതക് നൽകും. കേരളത്തിൽ നിന്ന് നാല് പേർക്ക് ഉത്തം ജീവൻ രക്ഷാ പതക് സമ്മാനിക്കും. അൽഫാസ് ബാവു, കൃഷ്ണൻ, കുമാരി മയൂഖ വി, മുഹമ്മദ് അദ്നാൻ മൊഹിയുദ്ദീൻ എന്നിവർക്കാണ് ഉത്തം ജീവൻ രക്ഷാ പതക്.നീരജ് ചോപ്രയ്ക്ക് പരം വിശിഷ്ട സേവ മെഡൽ സമ്മാനിക്കും.
ഉത്തം സേവാ മെഡൽ രണ്ട് മലയാളികൾക്ക് ലഭിക്കും. ലെഫ്റ്റനന്റ് ജനറൽ ജോൺസൺ പി മാത്യു, ലെഫ്റ്റനന്റ് ജനറൽ പി.ഗോപാലകൃഷ്ണമേനോൻ എന്നിവരാണ് ഉത്തം സേവാ മെഡലിന് അർഹരായ മലയാളികൾ. അതിവിശിഷ്ട സേവാ മെഡൽ ലെഫ്. ജനറൽ എം ഉണ്ണികൃഷ്ണൻ നായർക്ക് സമ്മാനിക്കും.
റിപ്പബ്ലിക് ദിനത്തിന് മുന്നോടിയായി ഒളിംപിക്സ് സ്വർണമെഡൽ ജേതാവ് നീരജ് ചോപ്രയ്ക്ക് പരം വിശിഷ്ട സേവാ മെഡൽ നൽകിയും ആദരിക്കും. ഇന്ന് വൈകിട്ട് രാഷ്ട്രപതി ഭവനിൽ വെച്ചു നടക്കുന്ന ചടങ്ങിലാണ് അവാർഡ് ദാനം നടക്കുക. 12 ശൗര്യചക്ര, 29 പരം വിശിഷ്ട സേവാ മെഡൽ, നാല് ഉത്തം യുദ്ധ് സേവാ മെഡൽ, 53 അതി വിശിഷ്ട സേവാ മെഡൽ, 13 യുദ്ധ് സേവാ മെഡൽ എന്നിവയും ഇന്ന് സമ്മാനിക്കും.
