തിരുവനന്തപുരം: ആറ്റിങ്ങലിൽ അശ്ലീല ദൃശ്യങ്ങൾ കാണിച്ച് മാദ്ധ്യമ പ്രവർത്തകയോട് അപമര്യാദയായി പെരുമാറിയ പ്രതി പിടിയിൽ. ബാലരാമപുരം സ്വദേശി അച്ചു കൃഷ്ണയാണ് പിടിയിലായത്. 21 കാരനായ പ്രതിയെ സിസിടിവി ദൃശ്യങ്ങളുടെ സഹായത്തോടെയാണ് പോലീസ് പിടികൂടിയത്.
ഇന്നലെ രാത്രിയാണ് ബസ് കാത്തു നിൽക്കുന്ന മാദ്ധ്യമ പ്രവർത്തകയോട് ഇയാൾ മോശമായി പെരുമാറിയത്. മൊബൈലിൽ അശ്ലീല ദൃശ്യങ്ങൾ കാണിച്ച ശേഷം അപമാനിക്കാൻ ശ്രമിക്കുകയായിരുന്നു. മാദ്ധ്യമ പ്രവർത്തക ബഹളം ഉണ്ടാക്കിയതോടെ ഇയാൾ ഓടി രക്ഷപ്പെടാൻ ശ്രമിച്ചു. മാദ്ധ്യമ പ്രവർത്തകയും നാട്ടുകാരും അച്ചുവിന്റെ പുറകേ ഓടിയെങ്കിലും ഇയാൾ രക്ഷപ്പെടുകയായിരുന്നു. ഉടൻ തന്നെ മാദ്ധ്യമ പ്രവർത്തക പോലീസിൽ പരാതി നൽകി.
വ്യാഴാഴ്ച രാവിലെയാണ് സംഭവത്തിന്റെ സിസിടിവി ദൃശ്യങ്ങൾ പോലീസിന് ലഭിച്ചത്. സംഭവ സമയം ഇയാൾ മാസ്‌ക് ധരിച്ചിട്ടുണ്ടെങ്കിലും ദൃശ്യങ്ങളിൽ നിന്നും ഇയാളുടെ മുഖം ഏറെക്കുറെ വ്യക്തമായിരുന്നു.
