തിരുവനന്തപുരം: ആത്മകഥ പുറത്തിറക്കാനൊരുങ്ങി മുഖ്യമന്ത്രിയുടെ മുൻ പ്രിൻസിപ്പൽ സെക്രട്ടറിയും സപോർട്‌സ് -യുവജനകാര്യ സെക്രട്ടറിയുമായ എം ശിവശങ്കർ. അശ്വത്ഥാമാവ് വെറും ആന എന്ന പേരിലാണ് അദ്ദേഹം തന്റെ ആത്മകഥ പുറത്തിറക്കുന്നത്.
ജയിലിലെ അനുഭവങ്ങളും അന്വേഷണ ഏജൻസികളുടെ സമീപനവും പുസ്തകത്തിൽ ഉൾപ്പെടുത്തിയിട്ടുണ്ടെന്നാണ് വിവരം. പുസ്തകം ശനിയാഴ്ച പുറത്തിറക്കും. ഡിസി ബുക്‌സ് ആണ് പുസ്തകം പുറത്തിറക്കുന്നത്.
സ്വർണക്കടത്തുമായി ബന്ധപ്പെട്ട വെളിപ്പെടുത്തലുകൾ ആത്മകഥയിലുണ്ടെന്നാണ് റിപ്പോർട്ട്. സ്വപ്‌നയുടെ സ്വർണക്കടത്ത് ബന്ധമറിഞ്ഞപ്പോൾ ഞെട്ടി, സ്വപ്‌നയുമായി മൂന്ന് വർഷത്തെ അടുത്ത പരിചയം ഉണ്ടായിരുന്നു, ബഗേജ് കസ്റ്റംസ് പിടിച്ചുവെച്ചപ്പോൾ സ്വപ്‌ന സഹായം തേടി, തുടങ്ങിയ വിവരങ്ങൾ പുസ്തകത്തിലുണ്ടെന്നാണ് വിവരം.
ആത്മകഥ പുറത്തിറങ്ങുന്നതോടെ സ്വർണക്കടത്ത് സംബന്ധിച്ച കൂടുതൽ വിവരങ്ങൾ പുറത്താവുമോ എന്ന് ഉറ്റ് നോക്കുകയാണ് കേരളം.
സ്വർണക്കടത്ത് കേസിൽ പ്രതിചേർക്കപ്പെട്ട ശിവശങ്കറിനെ ജോലിയിൽ നിന്നും സസ്പെൻഡ് ചെയ്തിരുന്നു. ശേഷം ചീഫ് സെക്രട്ടറി അദ്ധ്യക്ഷനായ സമിതിയുടെ ശുപാർശ പ്രകാരം സസ്പെൻഷൻ പിൻവലിക്കുകയായിരുന്നു. തുടർന്ന് അദ്ദേഹത്തെ സ്പോർട്സ് വകുപ്പിൽ സെക്രട്ടറിയായി നിയമിക്കുകയായിരുന്നു.
