ഭോപ്പാൽ : മദ്ധ്യപ്രദേശിലെ രണ്ട് നഗരങ്ങളുടെ പേര് മാറ്റാൻ കേന്ദ്രം അനുമതി നൽകിയതായി മുഖ്യമന്ത്രി ശിവ്രാജ് സിംഗ് ചൗഹാൻ. ഹൊസൻഗാബാദ്, ബബായി എന്നീ നഗരങ്ങളുടെ പേരാണ് നർമ്മദപുരം, മഖൻ നഗർ എന്നിങ്ങനെയാക്കി മാറ്റിയത്. ഹൊസൻഗാബാദ് ജില്ലയിലാണ് രണ്ട് നഗരങ്ങളും സ്ഥിതി ചെയ്യുന്നത്.
നഗരങ്ങളുടെ പേര് മാറ്റാൻ അനുമതി നൽകിയതിന് അദ്ദേഹം പ്രധാനമന്ത്രി നരേന്ദ്ര മോദിക്കും കേന്ദ്ര സർക്കാരിനും നന്ദിയറിയിച്ചു. ഫെബ്രുവരി 7ന് നർമ്മദ ജയന്തിക്ക് രണ്ട് നഗരങ്ങളുടേയും പേര് ഔദ്യോഗികമായി മാറ്റുമെന്നും മുഖ്യമന്ത്രി പറഞ്ഞു. നർമ്മദ നദിയുടെ തീരത്ത് നിൽക്കുന്ന നഗരമായതിനാലാണ് ഹൊസൻഗാബാദിന്റെ പേര് നർമ്മദപുരം എന്നാക്കിയത്. മദ്ധ്യപ്രദേശിന്റെ ജീവനാഡിയാണ് നർമ്മദ.
പ്രമുഖ മാദ്ധ്യമപ്രവർത്തകനും കവിയുമായ മഖൻലാൽ ചതുർവേദിയുടെ ജന്മനാടാണ് ബബായി. അദ്ദേഹത്തിന്റെ ഓർമ്മയ്ക്ക് വേണ്ടിയാണ് നഗരത്തിന്റെ പേര് മഖൻ നഗർ എന്നാക്കുന്നത്. 1889 ഏപ്രിൽ നാലിന് ജനിച്ച മഖൻലാൽ ചതുർവേദി പണ്ഡിറ്റ് ജി എന്നാണ് അറിയപ്പെട്ടിരുന്നത്. സ്വാതന്ത്ര്യ സമരപോരാട്ടം മുന്നിൽ നിന്ന് നയിച്ച വ്യക്തി കൂടിയാണ് അദ്ദേഹം.
