കോഴിക്കോട്: ജോലി ചെയ്യുന്ന സ്ഥാപനങ്ങളിൽ നിന്നും തൊഴിലാളികൾക്ക് സമ്മാനങ്ങൾ ലഭിക്കാറുണ്ട്. ചില പ്രത്യേക ദിവസങ്ങളിലും, ജോലിയിലുള്ള മിടുക്കും എല്ലാം ചൂണ്ടിക്കാട്ടിയാണ് സ്ഥാപനങ്ങൾ തൊഴിലാളികൾക്ക് സമ്മാനങ്ങൾ നൽകുന്നത്. അത്തരത്തിലൊരു സ്ഥാപനം തന്റെ വിശ്വസ്തനായ തൊഴിലാളിക്ക് ഒരു കാർ സമ്മാനമായി നൽകിയിരിക്കുകയാണ്. വെറും കാറല്ല, സാക്ഷാൽ മെഴ്സിഡൻസ് ബെൻസിന്റെ ചെറു എസ് യുവിയായ ജിഎൽഎ. ഹേയ്, ബെൻസ് ഓ….ചുമ്മാ പറയല്ലേ, എന്തായാലും കേരളത്തിൽ ആയിരിക്കില്ല എന്നൊക്കെ പറയാൻ വരട്ടേ, സംഗതി സത്യമാണ്.
നമ്മുടെ കേരളത്തിൽ ഡിജിറ്റൽ ഉപകരണങ്ങളുടെ റീട്ടെയിൽ വ്യാപാര രംഗത്തെ മുൻനിരക്കാരായ മൈ ജിയുടെ ചെയർമാനും എംഡിയുമായ എ.കെ.ഷാജിയാണ് ഒപ്പം ജോലി ചെയ്യുന്ന വ്യക്തിക്ക് ബെൻസ് കാർ സമ്മാനമായി നൽകിയത്. മൈ ജിയുടെ ചീഫ് ബിസിനസ് ഡെവലപ്മെന്റ് ഓഫീസറായ കോഴിക്കോട് സ്വദേശി സി.ആർ അനീഷിനാണ് ബെൻസിന്റെ ജിഎൽഎ സമ്മാനമായി ലഭിച്ചത്.
കാൽനൂറ്റാണ്ടോളമായി ഷാജിയോടൊപ്പം നടത്തിയ ആത്മാർത്ഥമായ സേവനങ്ങളാണ് അനീഷിനെ ഈ സമ്മാനത്തിന് അർഹനാക്കിയത്. റിസോർട്ടിൽ വെച്ച് നടന്ന ജീവനക്കാരുടെ കുടുംബ സംഗമത്തിലാണ് അനീഷിനെ തേടി ഈ സർപ്രൈസ് എത്തിയത്. അപ്രതീക്ഷിതമായി ലഭിച്ച ഈ സമ്മാനത്തിന്റെ ഷോക്കിലാണ് അനീഷ് ഇപ്പോഴും എന്ന് വീട്ടുകാർ പറയുന്നു.
മൈ ജി എന്ന ഒരു ബ്രാൻഡ് ആരംഭിക്കുന്നതിന് മുൻപ് തന്നെ ഷാജിയുടെ നിഴലായി ഉണ്ടായിരുന്ന ആളാണ് അനീഷ്. ഷാജിയുടെ വളർച്ചയിലും, താഴ്ചയിലും എല്ലാം അനീഷ് ഒപ്പമുണ്ടായിരുന്നു. ബ്രാൻഡിന്റെ വളർച്ചയിൽ ഒപ്പം നിന്ന വ്യക്തിയോടുള്ള കരുതലായാണ് അനീഷിന് ബെൻസ് കാർ സമ്മാനമായി നൽകിയത്. ബെൻസിന്റെ ചെറു എസ് യുവിയായ ജിഎൽഎയുടെ 220 ഡിയാണ് അനീഷിന് സമ്മാനമായി നൽകിയത്. 1950 സിസി ഡീസൽ എഞ്ചിനാണ് വാഹനത്തിന്റെ ഹൃദയം. ഇത് 190 ബിഎച്പി കരുത്തും 400 എൻഎം ടോർക്കും ഉൽപാദിക്കുന്നു. 44 ലക്ഷം മുതലാണ് കാറിന്റെ എക്സ് ഷോറൂം വില.
Comments