ഇസ്ലാമാബാദ്: തിരഞ്ഞെടുപ്പിന് മുൻപായി പാകിസ്താനിലെ ജനങ്ങൾക്ക് മുൻപാകെ വച്ച ‘നയാ പാകിസ്താൻ’ എന്ന ആശയം നടപ്പാക്കുന്നതിൽ പരാജയപ്പെട്ടുവെന്ന് തുറന്ന് സമ്മതിച്ച് പാക് പ്രധാനമന്ത്രി ഇമ്രാൻ ഖാൻ. രാജ്യത്തെ സംവിധാനങ്ങളിലെ പിഴവാണ് ഇതിന് കാരണമെന്നാണ് ഇമ്രാന്റെ ആരോപണം. സർക്കാരിന് കീഴിലുള്ള 10 മന്ത്രാലയങ്ങൾക്കും ഡിവിഷനുകൾക്കും പുരസ്കാരം നൽകുന്ന ചടങ്ങിലാണ് വിവിധ മന്ത്രാലയങ്ങളുടെ പിഴവിനെ കുറ്റപ്പെടുത്തി ഇമ്രാൻ സംസാരിച്ചത്.
‘ സർക്കാർ രൂപീകരിച്ചു കഴിഞ്ഞപ്പോൾ വിപ്ലവകരമായ നടപടികളിലൂടെ വലിയ മാറ്റങ്ങൾ കൊണ്ടുവരണമെന്നാണ് ഞാൻ ആഗ്രഹിച്ചത്. പക്ഷേ നമ്മുടെ സംവിധാനങ്ങൾക്ക് ഇത് നടപ്പിലാക്കാൻ സാധിക്കില്ലെന്ന് മനസിലായി. രാജ്യതാത്പര്യവും സർക്കാരും തമ്മിൽ യാതൊരു ബന്ധവും ഇല്ലെന്നതാണ് ഏറ്റവും വലിയ പ്രശ്നം. കയറ്റുമതി വർദ്ധിപ്പിച്ച് രാജ്യത്തെ സുസ്ഥിരമാക്കാനോ, ജനങ്ങളുടെ ജീവിത സാഹചര്യം മെച്ചപ്പെടുത്താനോ, ദാരിദ്ര്യം ഇല്ലാതാക്കാനോ ഒന്നും നമ്മുടെ മന്ത്രാലയങ്ങൾ പ്രവർത്തിക്കുന്നില്ലെന്നും’ ഇമ്രാൻ ഖാൻ ആരോപിച്ചു.
അതേസമയം ഇമ്രാൻ ഖാനെതിരെ പാർലമെന്റിൽ അവിശ്വാസ പ്രമേയം അവതരിപ്പിക്കാൻ പാകിസ്ഥാൻ ഡെമോക്രാറ്റിക് മൂവ്മെന്റ് തീരുമാനിച്ചിട്ടുണ്ട്. ഏകകണ്ഠമായാണ് പാർട്ടി ഈ തീരുമാനമെടുത്തതെന്ന് പിഡിഎം മേധാവി ഫസ്ലുർ റഹ്മാൻ പറഞ്ഞു. ഇതിനായി മറ്റ് സഖ്യകക്ഷികളേയും ഇവർ സമീപിച്ചേക്കുമെന്നാണ് വിവരം.
