ലോകത്തിലെ ഏറ്റവും പ്രായം കുറഞ്ഞ അമ്മ പ്രസവിച്ചത് തന്റെ അഞ്ചാം വയസിലാണെന്ന് പറഞ്ഞാൽ നിങ്ങൾ വിശ്വസിക്കുമോ… അതെ.. വെറും അഞ്ചാം വയസിൽ പ്രസവിച്ച പെൺകുട്ടിയാണ് ലോകത്തെ ഏറ്റവും പ്രായം കുറഞ്ഞ അമ്മ.. ഒന്നാലോചിച്ച് നോക്കൂ.. കളിച്ച് ചിരിച്ച് നടക്കേണ്ട കുട്ടിക്കാലം.. ലൈംഗികത എന്താണെന്നോ ഒരാൾ പ്രസവത്തിലൂടെയാണ് ഈ ഭൂമിയിലേക്ക് വരുന്നതെന്നോ അറിയാത്ത പ്രായം. സമൂഹത്തിൽ നടക്കുന്ന ഒന്നിനെക്കുറിച്ചും അറിയേണ്ടാത്ത സമയം. ആ പ്രായത്തിൽ ഒരു കുഞ്ഞിന് ജന്മം നൽകി പരിപാലിക്കേണ്ടി വരുന്ന, അമ്മയെന്ന വലിയ ഉത്തരവാദിത്വം ഏറ്റെടുത്ത് കുട്ടിക്കാലത്തെ മനോഹരനിമിഷങ്ങൾ കിട്ടാതെ പോയ, ഒരുവൾ. ചരിത്രം രേഖപ്പെടുത്തിയ പെറുവിലെ ലിന മെദീനയെന്ന സ്ത്രീ..
പെറുവിലെ ടിക്രാപോയിൽ 1933ലാണ് ലിന മെദിന ജനിക്കുന്നത്. ലിനയുടെ അഞ്ചാം വയസിൽ അവളുടെ വയർ അസാധാരണമായി വീർക്കാൻ തുടങ്ങി. മാതാപിതാക്കൾ അവളെ ഡോക്ടറെ കാണിച്ചു. അവൾക്ക് വയറ്റിൽ ട്യൂമറാണെന്ന വിലയിരുത്തലിലാണ് ഡോക്ടർമാർ എത്തിയത്. എന്നാൽ ഏഴ് മാസം കഴിഞ്ഞപ്പോൾ ശസ്ത്രലോകത്തെ ഞെട്ടിപ്പിച്ച് കൊണ്ട് ആ സത്യം ഏവരും മനസിലാക്കി. അവൾ ഗർഭിണിയാണെന്ന്.. തുടർന്ന് 1939 മെയ് 14ന് അവളൊരു ആൺകുഞ്ഞിന് ജന്മം നൽകി. ശസ്ത്രക്രിയ വഴി കുഞ്ഞിനെ പുറത്തെടുത്തു. അഞ്ചുവയസും ഏഴ് മാസവും 21 ദിവസവുമായിരുന്നു അന്ന് ലിനയുടെ പ്രായം. മൂന്നുകിലോയ്ക്കടുത്തായിരുന്നു കുഞ്ഞിന്റെ ഭാരം. അവന് ജെറാർഡോ എന്ന് പേര് നൽകി.
സാധാരണ പ്രസവം പോലെ കുറച്ചുദിവസങ്ങൾക്കകം അമ്മയും കുഞ്ഞും ആശുപത്രി വിട്ടു. ലിന ചേച്ചിയാണെന്നായിരുന്നു ആദ്യം ജെറാർഡോ കരുതിയിരുന്നത്. പിന്നീട് പത്തുവയസുള്ളപ്പോഴാണ് ലിനയാണ് തന്റെ അമ്മയെന്ന് അവൻ മനസിലാക്കിയത്. 1972ൽ ലിന വിവാഹിതയായി. അതിൽ അവൾക്ക് ഒരു മകൻ കൂടിയുണ്ട്. ഇതിനിടെ ജെറാർഡോ തന്റെ 40-ാം വയസിൽ അസുഖബാധിതനായി മരിച്ചു. ഋതുമതിയായ ഒരു പെൺകുട്ടിയുടെ ആന്തരികാവയവങ്ങൾക്ക് ഉണ്ടാകുന്ന വളർച്ച അഞ്ചാം വയസിലെ ലിനുടെ ഗർഭപാത്രത്തിനുണ്ടായിരുന്നു. അതിനാലാണ് അവൾ ഗർഭിണിയായത്. എന്നാൽ എന്തുകൊണ്ട് ലിനയ്ക്കിത് സംഭവിച്ചു.. എങ്ങനെ അവൾ ഗർഭിണിയായി എന്നതാണ് സ്വാഭാവികമായും ഉയരുന്ന ചോദ്യം. ഇതറിയാൻ പ്രികോഷ്യസ് പ്യൂബേർട്ടി എന്ന രോഗാവസ്ഥയെക്കുറിച്ച് അറിയേണ്ടതുണ്ട്.
എട്ട്-ഒമ്പത് വയസിനുള്ളിൽ കുട്ടികളിൽ കാണുന്ന രോഗാവസ്ഥയാണിത്. കേട്ടിട്ടില്ലേ.. ഒരു വയസുള്ള പെൺകുഞ്ഞ് ഋതുമതിയായി എന്നൊക്കെ.. ഇന്ത്യയിൽ ഇത്തരം സംഭവങ്ങൾ റിപ്പോർട്ട് ചെയ്തിട്ടുമുണ്ട്. പ്രികോഷ്യസ് പ്യൂബേർട്ടി സ്ഥിരീകരിക്കുന്നവർക്ക് ശരീര വളർച്ച പെട്ടെന്നാകാം സംഭവിക്കുന്നത്. പ്രത്യുൽപാദന ശേഷി ഇത്തരക്കാർക്ക് ചെറിയ വയസിൽ തന്നെ കൈവരിക്കാനാകുമെന്നതാണ് രോഗത്തിന്റെ സവിശേഷത. ഇതാണ് ലിന മെദീനയ്ക്കും സംഭവിച്ചത്.
അങ്ങനെയെങ്കിൽ അവൾ എങ്ങനെ ഗർഭിണിയായി..
ഇക്കാര്യത്തിന് ഔദ്യോഗികമായി സ്ഥിരീകരിച്ച ഒരു ഉത്തരമുണ്ടായിട്ടില്ല. എങ്കിലും ലിനയെ ഗർഭിണിയാക്കിയത് സ്വന്തം പിതാവ് തന്നെയായിരുന്നുവെന്നാണ് അന്നത്തെ മാദ്ധ്യമറിപ്പോർട്ടുകൾ സൂചിപ്പിക്കുന്നത്. ഇതിന്റെ പേരിൽ അയാൾ അറസ്റ്റിലാകുകയും കുറച്ചുനാൾ വിചാരണ നേരടുകയും ചെയ്തിരുന്നു. എന്നാൽ തെളിവില്ലാതിരുന്നതിനാൽ ഇയാളെ വെറുതെവിട്ടു.
സ്വന്തം പിതാവിന്റെ ലൈംഗിക വൈകൃതങ്ങൾക്ക് ഇരയായ, പ്രികോഷ്യസ് പ്യൂബേർട്ടി ബാധിതയായ ലിന, പിന്നീട് ഗർഭിണിയാവുകയായിരുന്നുവെന്നാണ് പലരും ഇക്കാര്യത്തെ വിലയിരുത്തിയത്. ലിനയ്ക്ക് ഇന്ന് പ്രായമേറെയായി.. 88 വയസായി.. ഇന്നുവരെയും ഒരു മാദ്ധ്യമത്തിനും അഭിമുഖം നൽകാൻ ലിന തയ്യാറായിട്ടില്ല. കുടുബജീവിതത്തിന്റെ സ്വകാര്യത കാത്തുസൂക്ഷിക്കാനായി സമീപിച്ച മാധ്യമപ്രവർത്തകരെയെല്ലാം ലിന മടക്കി അയക്കുകയായിരുന്നു.
