വീണ്ടും മുന്നറിയിപ്പുമായി കേരള പോലീസ്. മേസേജുകളിലൂടെ കിട്ടുന്ന ലിങ്കുകൾ കെണിയിൽ പെടുത്താൻ കെൽപ്പുള്ളവയാകാമെന്നും അത്തരം ലിങ്കുകളിൽ ക്ലിക്ക് ചെയ്യുന്നതിന് മുമ്പ് ജാഗ്രത പാലിക്കണമെന്നും കേരളപോലീസ്. ഫേസ്ബുക്കിൽ പങ്കുവെച്ച പോസ്റ്റിലാണ് പോലീസിന്റെ മുന്നറിയിപ്പ്.
പണമോ സമ്മാനങ്ങളോ വാഗ്ദാനം ചെയ്ത് ഇ-മെയിൽ വഴിയോ മെസഞ്ചറിലൂടെയോ, എസ്എംഎസ് ആയോ നിങ്ങൾക്ക് ലഭിക്കുന്ന ലിങ്കുകളിൽ ഒരു കാരണവശാലും ക്ലിക്ക് ചെയ്യരുത്. ലിങ്ക് ടെക്സ്റ്റ് ഒരു യുആർഎൽ പോലെ തോന്നിക്കുമെങ്കിലും ലിങ്ക് ക്ലിക്ക് ചെയ്താൽ അബദ്ധത്തിൽപ്പെട്ടേക്കാമെന്ന് പോലീസ് പറയുന്നു.
ഇത്തരമൊരു മെസേജ് ഫോണിലേക്കോ മെയിലിലേക്കോ വന്നാൽ മൗസ് പോയിന്റർ ലിങ്കിൽ ക്ലിക്ക് ചെയ്യാതെ തന്നെ മുകളിലൂടെ നീക്കുക. സ്റ്റാറ്റസ് ബാറിൽ നിന്നും ലിങ്കിന്റെ ലക്ഷ്യസ്ഥാനം മനസിലാക്കാൻ കഴിയും. നമ്മൾ ഉദ്ദേശിക്കുന്ന സൈറ്റിലേക്ക് ലിങ്ക് പോകുന്നില്ലെങ്കിലോ മറിച്ച് ഏതെങ്കിലും ഒരു പ്രത്യേക ഫയലിലേക്ക് (.exe പോലുള്ളവ) എത്തിക്കുന്നതോ ആണെന്ന സൂചന ലഭിച്ചാൽ യാതൊരു കാരണവശാലും ആ ലിങ്കിൽ ക്ലിക്ക് ചെയ്യരുതെന്നും കേരള പോലീസ് പങ്കുവെച്ച മുന്നറിയിപ്പ് പോസ്റ്റിൽ പറയുന്നു.
