റഷ്യയ്‌ക്കെതിരെ പോരാടാൻ കരുത്തായത് ഭഗവദ് ഗീത ശ്ലോകങ്ങൾ ; മനോവീര്യം കൂട്ടാൻ കൃഷ്ണസ്തുതികളും , ഹിന്ദു മന്ത്രങ്ങളും ചൊല്ലി യുക്രെയ്ൻ സൈനികൻ

കീവ് ; റഷ്യക്കാർക്കെതിരെ പോരാടാനുള്ള കരുത്ത് നൽകിയത് ഭഗവദ് ഗീത ശ്ലോകങ്ങൾ ആണെന്ന് യുക്രെയ്ൻ സൈനികൻ . ആൻഡ്രെ, എന്ന സൈനികനാണ് റഷ്യൻ ആക്രമണങ്ങൾക്കെതിരെ കീവിനെ പ്രതിരോധിക്കാൻ സ്വയം തയ്യാറെടുക്കുമ്പോൾ കൂടുതൽ ശക്തി നേടുന്നതിനായി ദിവസവും ഹിന്ദു ശ്ലോകങ്ങൾ മുടങ്ങാതെ ചൊല്ലുന്നത് .

സ്വകാര്യ മാദ്ധ്യമത്തോട് സംസാരിക്കുമ്പോൾ, താൻ കടുത്ത കൃഷ്ണ ഭക്തനാണെന്നും തന്റെ ആത്മവിശ്വാസം വർധിപ്പിക്കാൻ മഹാ മന്ത്രമായ “ഹരേ രാമ ഹരേ കൃഷ്ണ” യും മറ്റ് ഹിന്ദു മന്ത്രങ്ങളും ശ്ലോകങ്ങളും ഉരുവിടുന്നുണ്ടെന്നും ആൻഡ്രെ പറഞ്ഞു.

താൻ രണ്ടുതവണ ഇന്ത്യ സന്ദർശിച്ചിട്ടുണ്ട് . താൻ ‘ക്ഷത്രിയ’ യോദ്ധാവ് അല്ല . എങ്കിലും റഷ്യൻ ആക്രമണങ്ങളിൽ നിന്ന് തന്റെ ജന്മനാടായ യുക്രെയ്നെ സംരക്ഷിക്കാൻ ആഗ്രഹിക്കുന്നുവെന്നും ആൻഡ്രെ പറഞ്ഞു.

യുക്രെയ്ൻ നഗരങ്ങളുടെ നിയന്ത്രണം ഏറ്റെടുക്കാൻ റഷ്യയും , പ്രതിരോധിക്കാൻ യുക്രെയ്ൻ സൈനികരും പരസ്പരം ഏറ്റുമുട്ടുമ്പോൾ ഇരുവശത്തുമുള്ള സൈനികർ അവരുടെ മനോവീര്യം ഉയർത്താൻ പാടുപെടുകയാണ്. അത്തരം സമയത്ത് മനസ് ശാന്തമായിരിക്കാൻ ഹിന്ദു മന്ത്രങ്ങൾ ഉരുവിടുന്നത് നല്ലതാണെന്നും , കരുത്തേകുമെന്നും ആൻഡ്രെ പറയുന്നു.

25 വർഷം മുമ്പ് കീവിലെ ‘ഹരേ കൃഷ്ണ’ പ്രസ്ഥാനത്തിൽ ചേർന്നപ്പോഴാണ് താൻ മന്ത്രങ്ങൾ പഠിച്ചത്. പുസ്തകങ്ങളും ഹിന്ദു ഗ്രന്ഥങ്ങളും വായിച്ചാണ് താൻ ഭക്തിയുടെയും വേദാന്തത്തിന്റെയും ആശയം കണ്ടെത്തിയത് – അദ്ദേഹം പറയുന്നു . ഒരു മുൻ പ്രൊഫഷണൽ അത്‌ലറ്റ് കൂടിയാണ് ആൻഡ്രെ.