ന്യൂഡൽഹി : ബിജെപിയുടെ രാഷ്ട്രീയ താത്പര്യങ്ങൾ പ്രദർശിപ്പിക്കാൻ വേണ്ടി നിർമ്മിച്ച ചിത്രമാണ് ദി കശ്മീരി ഫയൽസ് എന്ന ആരോപണവുമായി സിപിഐ രാജ്യസഭാ എംപി ബിനോയ് വിശ്വം. കശ്മീരി ഹിന്ദുക്കളെക്കുറിച്ചുള്ള ബിജെപിയുടെ കാഴ്ചപ്പാടാണ് ഇതിലൂടെ പ്രതിഫലിക്കുന്നത്. ചിത്രം റിലീസ് ചെയ്ത് ലോകമെമ്പാടുമുള്ള ഭാരതീയരിൽ നിന്നും മികച്ച പ്രതികരണം ലഭിക്കുന്നതിനിടെയാണ്ആരോപണവുമായി നേതാവ് രംഗത്തെത്തിയിരിക്കുന്നത്.
ഇത് ബിജെപിയുടെ കഥയാണ്, ഇന്ത്യയുടെ കഥയല്ലെന്ന് ബിനോയ് വിശ്വം പറഞ്ഞു. ബിജെപിയുടെ രാഷ്ട്രീയ കാഴ്ചപ്പാടുകളെയും താത്പര്യങ്ങളെയും ശ്രദ്ധാപൂർവ്വം എടുത്ത് കാട്ടുന്നതാണ് ദി കശ്മീരി ഫയൽസ്. അതിൽ മോദി ഭരണത്തിന്റെ കാഴ്ചപ്പാടുകളെയാണ് പ്രശംസിക്കുകയും പ്രതിഫലിക്കുകയും ചെയ്യുന്നത് എന്നും ബിനോയ് വിശ്വം പ്രതികരിച്ചു.
കോൺഗ്രസ് മുതിർന്ന നേതാവ് ദിഗ്‌വിജയ് സിംഗും ചിത്രത്തിനെതിരെ രംഗത്തെത്തിയിട്ടുണ്ട്. രാജ്യത്ത് മതഭ്രാന്ത് വളർത്താൻ കാരണക്കാർ ആർഎസ്എസുകാരാണെന്ന് ദിഗ്‌വിജയ് സിംഗ് ആരോപിച്ചു. കശ്മീരി പണ്ഡിറ്റുകളും മുസ്ലീങ്ങളും ഇന്ത്യയുടെ മക്കളാണെന്നും അവർക്ക് അവരുടെ സ്ഥലത്ത് താമസിക്കാനുള്ള അവകാശം ഉണ്ടെന്നും കോൺഗ്രസ് നേതാവ് പറഞ്ഞു.
