ന്യൂഡൽഹി: പ്രദർശനം തുടങ്ങി ദിവസങ്ങൾക്കുള്ളിൽ റെക്കോർഡ് കളക്ഷൻ സ്വന്തമാക്കി വിവേക് അഗ്നിഹോത്രിയുടെ ദ കശ്മീർ ഫയൽസ്. തീയേറ്ററുകളിൽ പ്രദർശനം ഒരാഴ്ച പിന്നിടുന്നതിന് മുൻപ് തന്നെ 100 കോടി നേട്ടത്തിന് തൊട്ടരികെ എത്തിയിരിക്കുകയാണ് ചിത്രം. ചിത്രം പുറത്തിറങ്ങി ഏഴാം ദിവസമായ ഇന്നലെ 19 കോടി രൂപയാണ് കളക്ഷനായി ലഭിച്ചത്. ഇതോടെ ചിത്രത്തിന്റെ ആകെ ബോക്സ്ഓഫീസ് കളക്ഷൻ 98.25 കോടി രൂപയായി. മാർച്ച് 11നാണ് ചിത്രം റിലീസ് ചെയ്തത്.
ആറാം ദിവസം വരെ 79.25 കോടി രൂപയായിരുന്നു ചിത്രത്തിന്റെ ആഗോള കളക്ഷൻ. ഏഴാം ദിവസം 19.05 കോടിയും നേടിയും നേടി. മുൻ ദിവസത്തെ അപേക്ഷിച്ച് 5.83 ശതമാനം കൂടുതൽ വരുമിത്. രണ്ടാം ആഴ്ചയിലെ കളക്ഷൻ ആദ്യ ആഴ്ചയിലേതിനെക്കാൾ കൂടുതൽ ആയിരിക്കുമെന്നാണ് റിപ്പോർട്ട്. മുൻ ദിവസങ്ങളിലേതിനെ അപേക്ഷിച്ച്, കശ്മീർ ഫയൽസ് കാണാൻ കൂടുതൽ ആളുകൾ തീയേറ്ററുകളിലേക്ക് എത്തുന്നുണ്ടെന്നും റിപ്പോർട്ടുകൾ പറയുന്നു.
കശ്മീരി പണ്ഡിറ്റുകളുടെ ജീവിതവും യാതനകളും തുറന്ന് പറയുന്ന ചിത്രമാണ് ദി കശ്മീർ ഫയൽസ്. യഥാർത്ഥ സംഭവങ്ങളെ അടിസ്ഥാനമാക്കിയുള്ള ദി കശ്മീർ ഫയൽസ് വിവേഗ് അഗ്നിഹോത്രിയാണ് സംവിധാനം ചെയ്തിരിക്കുന്നത്. രണ്ട് മണിക്കൂറും 50 മിനിറ്റുമാണ് ചിത്രത്തിന്റെ ദൈർഘ്യം. ചിത്രത്തിൽ മിഥുൻ ചക്രവർത്തി, അനുപം ഖേർ, ദർശൻ കുമാർ, പല്ലവി ജോഷി, ചിന്മയി മാണ്ട്ലേകർ, പുനീത് ഇസ്സർ, പ്രകാശ് ബേലവാടി, അതുൽ ശ്രീവാസ്തവ, മൃണാൽ കുൽക്കർണി എന്നിവരാണ് പ്രധാന വേഷങ്ങളിൽ അഭിനയിച്ചിരിക്കുന്നത്.
