മലയാളികളുടെ എക്കാലത്തെയും പ്രിയങ്കരനായ നടനാണ് കുഞ്ചാക്കോ ബോബൻ. ഭീമന്റെ വഴിയിലൂടെ പ്രേക്ഷകർക്ക് മുമ്പിൽ ഒടുവിലെത്തിയ ചാക്കോച്ചൻ ഇപ്പോൾ സമൂഹമാദ്ധ്യമങ്ങളിൽ ചർച്ചയായത് തെങ്ങിന്റെ മണ്ടയിൽ കയറിയതോടെയാണ്..
ഹോളിദിനത്തിൽ ഹോളിഡേ ഫൺ എന്ന തലക്കെട്ടോടെ പങ്കുവെച്ച ചാക്കോച്ചന്റെ ഫേസ്ബുക്ക് പോസ്റ്റാണ് ഇപ്പോഴത്തെ ചർച്ചാ വിഷയം. കരിക്ക് ഷെയ്ക്ക് കുടിക്കാൻ മോഹം തോന്നി തെങ്ങിൽ കയറിയെന്ന് പറഞ്ഞ് ചാക്കോച്ചൻ പങ്കുവെച്ച ചിത്രങ്ങൾ നിമിഷനേരം കൊണ്ടാണ് വൈറലായത്.
‘ഒരു കരിക്ക് ഷേക്ക് കുടിക്കാൻ മോഹം..
ഒന്നും നോക്കിയില്ല അപ്പൊത്തന്നെ തെങ്ങു കേറി..
കരിക്കിട്ടു..
ഷെയ്ക്കടിച്ചു ഉണ്ടാക്കി..
കുടിച്ചു!
ആഗ്രഹങ്ങൾ മാറ്റിവെക്കരുത്..
പരിശ്രമിച്ച് അപ്പോൾത്തന്നെ സാധിക്കണം’
ഇതായിരുന്നു ചാക്കോച്ചന്റെ ഫേസ്ബുക്ക് പോസ്റ്റ്. ഇതോടൊപ്പം തെങ്ങിൽ കയറുന്ന ചിത്രങ്ങളും മുകളിൽ ഇരുന്നുകൊണ്ട് കരിക്ക് പിരിക്കുന്ന ചിത്രവും അദ്ദേഹം പങ്കുവെച്ചിട്ടുണ്ട്. ഒപ്പം ഷെയ്ക്ക് കുടിക്കുന്ന ചിത്രം പങ്കുവെക്കാനും താരം മറന്നില്ല.
എന്നാൽ നടൻ തെങ്ങിൽ കയറുന്നതായി അഭിനയിക്കുകയാണെന്നാണ് ഫോളോവേഴ്സായ ഒരു കൂട്ടരുടെ വാദം. മറ്റ് ചിലർ താരത്തിന്റെ നേരംപോക്കിനെ അഭിനന്ദിക്കുകയും ചെയ്തു. എയറിൽ കയറിയ ചാക്കോച്ചൻ ഫേസ്ബുക്ക് പോസ്റ്റിട്ടതോടെ വീണ്ടും എയറിൽ കയറ്റിയിരിക്കുകയാണ് ആരാധകർ.
