രാവും പകലും പോലെ തന്നെ സന്തോഷവും സങ്കടങ്ങളും ഇടകലർന്നതാണ് ഓരോ ജീവിതവും. ഏത് പ്രതിസന്ധിയിലും തളരാതെ, അവയെ എല്ലാം പുഞ്ചിരിയോടെ നേരിടുക എന്നത് വളരെ പ്രധാനമാണ്. ഈ ഓർമ്മപ്പെടുത്തലാണ് ഓരോ വർഷവും ആഘോഷിച്ചുവരുന്ന അന്താരാഷ്ട്ര സന്തോഷ ദിനം. എല്ലാ വർഷവും മാർച്ച് 20നാണ് അന്താരാഷ്ട്ര സന്തോഷദിനം ആചരിക്കുന്നത്.
2013 മുതലാണ് ഐക്യരാഷ്ട്രസഭ ഇന്റർനാഷണൽ ഹാപ്പിനസ് ഡേ ആഘോഷിക്കാൻ തുടങ്ങിയത്. സന്തോഷമെന്നാൽ, സാർവത്രികമായ മൗലികാവകാശമാണെന്ന സന്ദേശം പ്രചരിപ്പിക്കുകയാണ് ഈ ദിനത്തിലൂടെ ലക്ഷ്യമിടുന്നത്. 2013 മാർച്ചിൽ ന്യൂയോർക്ക് സിറ്റിയിൽ നടന്ന ഒരു കോൺഫറൻസിൽ എൻദാബ മണ്ടേലയും ചെൽസി ക്ലിന്റണും ആദ്യ ആഘോഷം ആരംഭിച്ചു. ഗായകനും ഗാനരചയിതാവുമായ ഫാരെൽ വില്യംസ് 2013ലെ ആഘോഷത്തിന്റെ ഭാഗമായിരുന്നു.
സന്തോഷത്തിന്റെ പ്രാധാന്യം വിളിച്ചോതുന്നതിന് പുറമെ, ആഗോള അസമത്വ ഇല്ലാതാക്കുക, ദാരിദ്ര്യം അവസാനിപ്പിക്കുക, ഭാവി തലമുറകൾക്കായി ഭൂമിയെ സംരക്ഷിക്കുക തുടങ്ങിയ ലക്ഷ്യങ്ങളോടെയാണ് ഈ ദിനത്തിൽ ക്യാമ്പെയ്നുകൾ സംഘടിപ്പിക്കുന്നത്. ‘ബിൽഡ് ബാക്ക് ഹാപ്പിയർ’ എന്നതാണ് ഇത്തവണത്തെ അന്താരാഷ്ട്ര സന്തോഷ ദിനത്തിന്റെ സന്ദേശം.
