ദുബായ്: സ്കൂൾ അവധിയും എക്സ്പോ 2020ന്റെ സമാപനവും കണക്കിലെടുത്ത് യാത്രക്കാർ നേരത്തെ എത്തണമെന്ന് ദുബായ്, അബുദാബി വിമാനത്താവള അധികൃതരുടെ മുന്നറിയിപ്പ്. എക്സ്പോയിലെ അവസാന വാരാന്ത്യ അവധി ദിനങ്ങളായ മാർച്ച് 25 മുതൽ 28 വരെയും സ്കൂളുകൾ തുറക്കുന്ന ഏപ്രിൽ ഏഴ് മുതൽ ഒമ്പത് വരെയും ഉണ്ടായേക്കാവുന്ന തിരക്ക് കണക്കിലെടുത്താണ് മുന്നറിയിപ്പ് നൽകിയത്.
വിമാനത്താവളത്തിലെത്തുന്ന വാഹനങ്ങളുടെ എണ്ണം വർധിക്കുന്നതിനാൽ ഗതാഗതക്കുരുക്ക് മുൻകൂട്ടി കാണണം. ദുബായ് വിമാനത്താവളത്തിന്റെ ടെർമിനൽ വൺ, ടെർമിനൽ ത്രീ എന്നിവ വഴി യാത്ര ചെയ്യുന്നവർ വിമാനത്താവളത്തിലേക്ക് വരാൻ പരമാവധി ദുബായ് മെട്രോ ഉപയോഗിക്കണമെന്ന് ടെർമിനൽ ഓപ്പറേഷൻസ് അറിയിച്ചു.
യുകെ, മാലിദ്വീപ്, ബഹ്റൈൻ, അയർലാൻഡ് തുടങ്ങിയ രാജ്യങ്ങൾ കൊറോണ നിയന്ത്രണങ്ങൾ ഒഴിവാക്കിയ സാഹചര്യത്തിൽ അബുദാബി വിമാനത്താവളത്തിലും തിരക്ക് വർധിച്ചിട്ടുണ്ടെന്ന് എത്തിഹാദ് എയർലൈൻസ് അധികൃതരും പറഞ്ഞു. വിമാനത്താവളത്തിൽ എത്തുന്നത് നേരത്തേയാക്കുന്നതിനു പുറമേ, വീട്ടിൽ നിന്നുതന്നെ ഓൺലൈൻ ചെക്ക്-ഇൻ സംവിധാനം പ്രയോജനപ്പെടുത്തണം.
യുഎഇയിൽ താമസവിസയുള്ള 12 വയസിന് മുകളിലുള്ളവർ വിമാനത്താവളങ്ങളിലെ സ്മാർട്ട് ഗേറ്റ് പ്രയോജനപ്പെടുത്തുന്നത് സമയം ലാഭിക്കാൻ സഹായിക്കും. വിമാനം പുറപ്പെടുന്ന സമയവും ടെർമിനലും യാത്രക്ക് മുമ്പ് പരിശോധിച്ച് ഉറപ്പാക്കണമെന്നും അധികൃതർ മുന്നറിയിപ്പ് നൽകി. ദുബായ് എക്സ്പോ അവസാനിക്കുന്ന ദിനങ്ങളിൽ വൻ തിരക്കാണ് അധികൃതർ പ്രതീക്ഷിക്കുന്നത്.
