ബോക്സ് ഓഫീസിൽ പുതിയ റെക്കോർഡുമായി എസ്എസ് രാജമൗലി ചിത്രം ആർആർആർ. മാർച്ച് 25 ന് റിലീസ് ചെയ്ത ചിത്രം മൂന്ന് ദിവസം കൊണ്ട് 500 കോടി നേടിക്കൊണ്ടാണ് പുതിയ റെക്കോർഡ് സ്ഥാപിച്ചത്. ആഗോളതലത്തിലെ കണക്കാണിത്.
രാജമൗലിയുടെ അവസാന ചിത്രമായ ബാഹുബലി 2 ന്റെ റെക്കോർഡും ജൂനിയർ എൻടിആർ-റാം ചരൺ കൂട്ടുകെട്ടിൽ ഒരുക്കിയ ചിത്രം തിരുത്തി. മൂന്ന് ദിവസം കൊണ്ട് 500 കോടി എത്തിച്ച ആർആർആർ ആഗോള സിനിമാ ലോകത്ത് നമ്പർ വൺ സിനിമ എന്ന തലത്തിലേക്കാണ് എത്തിയിരിക്കുന്നത്. അന്താരാഷ്ട്ര തലത്തിൽ ആർആർആർ 60 മില്യൺ ഡോളർ കളക്ഷൻ നേടിയപ്പോൾ ഒപ്പം റിലീസ് ചെയ്ത ദി ബാറ്റ്മാൻ 45.5 മില്യൺ ഡോളറും, ദി ലോസ്റ്റ് സിറ്റി 35 മില്യൺ ഡോളറുമാണ് നേടിയത്. റിലീസ് ചെയ്ത് ആദ്യ ദിനം തന്നെ 223 കോടിയായിരുന്നു ചിത്രത്തിന്റെ കളക്ഷൻ.
എസ്എസ് രാജമൗലി സംവിധാനം ചെയ്യുന്ന ചിത്രത്തിൽ ജൂനിയർ എൻടിആർ, രാംചരൺ എന്നിവരാണ് പ്രധാന കഥാപാത്രങ്ങളായി എത്തിയത്. അജയ് ദേവ്ഗൺ, ആലിയ ഭട്ട്, ഒലിവിയ മോറിസ്, റേ സ്റ്റീവെൻസൺ, അലിസൺ ഡൂഡി തുടങ്ങിയ താരങ്ങളും അണിനിരക്കുന്നുണ്ട്. രാജമൗലിയുടെ അച്ഛൻ കെ വി വിജയേന്ദ്ര പ്രസാദ് തിരക്കഥയൊരുക്കുന്ന ‘ആർആർആറി’ൽ അഭിനയിക്കുന്നുമുണ്ട്.
1920കൾ പശ്ചാത്തലമാക്കുന്ന ചിത്രം അല്ലൂരി സീതാരാമ രാജു, കോമരം ഭീം എന്നീ സ്വാതന്ത്ര്യ സമര സേനാനികളുടെ കഥയാണ് പറയുന്നത്. യഥാർഥ ജീവിതത്തിൽ നേരിട്ട് കണ്ടിട്ടില്ലാത്ത ഇവർ പരസ്പരം കണ്ടിരുന്നെങ്കിലോ എന്ന ഭാവനയിലാണ് ചിത്രത്തിന്റെ കഥ രാജമൗലി എഴുതിയിരിക്കുന്നത്.
Comments