തൃശൂര്‍: സംസ്ഥാനത്ത് അവസാന വര്‍ഷ എംബിബിഎസ് പരീക്ഷ ബഹിഷ്‌കരിച്ച് വിദ്യാര്‍ത്ഥികള്‍. അധ്യയന ദൈര്‍ഘ്യം വെട്ടിക്കുറച്ച് പരീക്ഷ നടത്താനുള്ള തീരുമാനത്തിനെതിരെ വലിയ തോതില്‍ പരാതികള്‍ ഉയര്‍ന്നിരുന്നു. പാഠഭാഗങ്ങളും പരിശീലനവും പൂര്‍ത്തിയാക്കാതെ പരീക്ഷ നടത്തുന്നതില്‍ പ്രതിഷേധിച്ചാണ് വിദ്യാര്‍ത്ഥികള്‍ പരീക്ഷ ബഹിഷ്‌കരിക്കുന്നത്.
കോഴിക്കോട് മെഡിക്കല്‍ കോളേജില്‍ 20 പേരും, തൃശൂരില്‍ 60 പേരും മാത്രമാണ് പരീക്ഷയ്‌ക്ക് എത്തിയത്. കോഴിക്കോട് 216 വിദ്യാര്‍ത്ഥികളുണ്ട്. കോട്ടയത്ത് ആകെയുള്ള 150 വിദ്യാര്‍ത്ഥികളില്‍ 55 പേരും പരീക്ഷ എഴുതുന്നില്ല. പരീക്ഷ എഴുതുന്ന വിദ്യാര്‍ത്ഥികളുടെ എണ്ണം പരിഗണിച്ച് പരീക്ഷ മാറ്റുന്ന കാര്യം പരിഗണിക്കുമെന്ന് ആരോഗ്യ സര്‍വകലാശാല ഹൈക്കോടതിയില്‍ അറിയിച്ചിരുന്നു. ഒരു വര്‍ഷം കൊണ്ട് തീര്‍ക്കേണ്ട അധ്യയനം ആറ് മാസം കൊണ്ട് തീര്‍ത്തുവെന്നാണ് വിദ്യാര്‍ത്ഥികള്‍ പരാതിപ്പെടുന്നത്.
