മുംബൈ: രാമനവമി ദിനത്തില് മുംബൈയിലെ ദാദര് വെസ്റ്റില് സ്ഥിതി ചെയ്യുന്ന ശിവസേന ഭവന് പുറത്ത് ഹനുമാന് ചാലിസ ചൊല്ലുമെന്ന് എംഎന്എസ് പ്രവര്ത്തകര് അറിയിച്ചു. മസ്ജിദുകളിലെ ഉച്ചഭാഷിണിയെക്കുറിച്ച് സര്ക്കാര് ഒന്നും ചെയ്യുന്നില്ലെങ്കില് പള്ളികള്ക്ക് മുന്നില് ഇരട്ട ലൗഡ് സ്പീക്കറുകള് സ്ഥാപിച്ച് ഹനുമാന് ചാലിസ ജപിക്കുമെന്ന് മഹാരാഷ്ട്ര നവനിര്മാണ് സേന നേതാവ് രാജ് താക്കറെ മുന്നറിയിപ്പ് നല്കി. മുംബൈയിലെ ശിവാജി പാര്ക്കില് പാര്ട്ടിയുടെ വാര്ഷിക ഗുഡി പദ്വ സമ്മേളനത്തിലാണ് അദ്ദേഹം ഇക്കാര്യം പറഞ്ഞത്.
പ്രാര്ത്ഥിക്കാനുള്ള ഒരാളുടെ അവകാശത്തെ എതിര്ക്കുന്നില്ല, എന്നാല് പള്ളികളിലെ ഉച്ചഭാഷിണികള് നീക്കം ചെയ്യണം. അവ നീക്കം ചെയ്യണമെന്ന് ഞാന് സര്ക്കാരിനോട് അഭ്യര്ത്ഥിക്കുന്നു. അല്ലാത്തപക്ഷം, ആ പള്ളികള്ക്ക് മുന്നില് ഹനുമാന് ചാലിസ ചൊല്ലാന് ഞങ്ങള് ഇരട്ട ലൗഡ് സ്പീക്കറുകള് സ്ഥാപിക്കുമെന്നാണ് എംഎന്എസിന്റെ വെല്ലുവിളി.
അദ്ദേഹത്തിന്റെ പ്രസംഗത്തിനു തൊട്ടുപിന്നാലെ മഹാരാഷ്ട്ര നവനിര്മാണ് സേനയുടെ മുംബൈയിലെ ഘാട്കോപ്പറിലെ ഓഫീസില് സ്ഥാപിച്ചിരുന്ന ഉച്ചഭാഷിണികളില് നിന്ന് ഉച്ചത്തില് ‘ഹനുമാന് ചാലിസ’ വായിച്ചു.
അനുമതിയില്ലാതെ ഉച്ചഭാഷിണിയില് ഹനുമാന് ചാലിസ വായിച്ചതിന് എംഎന്എസ് നേതാവ് മഹേന്ദ്ര ഭാനുശാലിയെ മുംബൈ പൊലീസ് അറസ്റ്റ് ചെയ്തു. വരും കാലങ്ങളില്, ‘ജയ് ശ്രീ റാം’ ഉച്ചഭാഷിണിയില് ചൊല്ലുമെന്ന് അറസ്റ്റിനുപിന്നാലെ അദ്ദേഹം പ്രതികരിച്ചു.
പളളികളില് അനുവാദമില്ലാതെ ലൗഡ്സ്പീക്കര് ഉപയോഗിക്കാമെങ്കില് അവര്ക്കെതിരെയും നടപടി വേണം. എനിക്കെതിരെ എടുത്തിട്ടുണ്ടെങ്കില് എല്ലാവര്ക്കെതിരെയും നടപടിയെടുക്കണമെന്ന് അദ്ദേഹം ആവശ്യപ്പെട്ടു. ഉച്ചഭാഷിണി ഉപയോഗിക്കുന്നിടത്തെല്ലാം നടപടിയെടുക്കണമെന്നും അദ്ദേഹം കൂട്ടിച്ചേര്ത്തു.
