കാണാൻ ഇച്ചിരിയേയുള്ളുവെങ്കിലും സ്വാദിന്റെ കാര്യത്തിൽ കേമനാണ് വിദേശി പഴമായ സ്ട്രോബെറി. ഈ ഇത്തിരിക്കുഞ്ഞന്റെ ഫേ്ലവറിലുള്ള ഐസ്ക്രീം, ഷേയ്ക്ക്, മിഠായികൾ എന്നിവയെല്ലാം കൊച്ചുകുട്ടികൾ മുതൽ മുതിർന്നവർക്ക് വരെ വളരെ അധികം ഇഷ്ടമാണ്. സ്വാദ് കൊണ്ട് ആളുകളുടെ മനം കീഴടക്കിയ ഈ കുഞ്ഞൻ, ഇപ്പോൾ വലുപ്പം കൊണ്ട് ലോക റെക്കോർഡിൽ ഇടം നേടിയിരിക്കുകയാണ്. അറിയാം ലോക റെക്കോർഡിൽ ഇടം നേടിയ ഗിന്നസ് ബെറിയെ കുറിച്ച്…
കൃഷിയോടുള്ള താൽപര്യം കൊണ്ടാണ് ഇസ്രയേലിലെ കുടുംബ വ്യവസായ സംരംഭകയായ ഏരിയൽ സ്ട്രോബെറി നട്ടുപിടിപ്പിക്കാൻ തുടങ്ങിയത്. സാധാരണ സ്ട്രോബെറിയേക്കാൾ കുറച്ചധികം വലിപ്പം വെക്കുന്ന ഐലാൻ ഇനത്തിൽ പെട്ട സ്ട്രോബെറി ഇവർ കൃഷി ചെയ്തത്. എന്നാൽ, കുറച്ച് മാസങ്ങൾക്ക് ശേഷം കുഞ്ഞൻ സ്ട്രോബെറിയുടെ മാറ്റം കണ്ട് ഏരിയൽ ഒന്ന് ഞെട്ടി. അതിന് കാരണവുമുണ്ട്.
സാധാരണ ഗതിയിൽ സ്ട്രോബെറിയ്ക്ക് 20-30 ഗ്രാം വരെയാണ് തൂക്കം. എന്നാൽ ഈ ഗിന്നസ് ബെറിയ്ക്ക് 289 ഗ്രാമാണ് ഭാരം. ലോകത്തിലെ ഏറ്റവും ഭാരമേറിയ സ്ട്രോബെറിയ്ക്കുള്ള റെക്കോർഡാണ് ഇസ്രായേലിൽ നിന്നുള്ള ബെറിയ്ക്ക് ലഭിച്ചത്. ഇതിനുപുറമെ, ഈ സ്ട്രോബെറിയ്ക്ക് 18 സെന്റീമീറ്റർ നീളവും 34 സെന്റീമീറ്റർ ചുറ്റളവുമുണ്ട്. ഐലാൻ ഇനത്തിൽപെട്ട സ്ട്രോബെറിയാണിത്.
ജനുവരി അവസാനവും ഫെബ്രുവരി ആദ്യവുമാണ് പൊതുവെ സ്ട്രോബെറികൾ ഉണ്ടാകുന്നത്. പൂവിട്ട ശേഷം 45 ദിവസത്തേക്ക് സ്ട്രോബെറി വലുതായിക്കൊണ്ടേയിരുന്നു. അങ്ങനെയാണ് ഈ സ്ട്രോബെറിയ്ക്ക് ഇത്രയും വലിപ്പം വച്ചത് എന്ന് ഗിന്നസ് വേൾഡ് റെക്കോർഡ് സമിതിയിലെ അംഗമായ ഡോ. ഡായ് പറഞ്ഞു.
ഇസ്രായേലിലെ കാഡിമ-സോറനിൽ സ്ഥിതി ചെയ്യുന്ന ‘സ്ട്രോബെറി ഇൻ ദി ഫീൽഡ്’ എന്ന കുടുംബ വ്യവസായ സംരംഭകയാണ് ഏരിയൽ. താരതമ്യേന മറ്റ് സ്ട്രോബെറികളിൽ നിന്നും അധികമായി വലുപ്പം വെയ്ക്കുന്ന ഇനമാണ് ഐലാൻ. ഇസ്രായേൽ അഗ്രികൾച്ചറൽ റിസർച്ച് ഓർഗനൈസേഷനിലെ (എആർഒ) ഗവേഷകനായ ഡോ.നിർ ദായിയാണ് ഐലാൻ ഇനം സ്ട്രോബെറി ആദ്യമായി വളർത്തിയത്. ടെൽ-അവീവിനടുത്തെ ബെറ്റ്-ദാഗനിലുള്ള എആർഒ വോൾക്കാനി സെന്ററിലാണ് ആദ്യമായി ഈ ഇനം വളർന്നത്.
സ്ട്രോബെറി കൃഷി ചെയ്യുമ്പോൾ സാധാരണയായി ഒന്നിലധികം ബെറികൾ കൂടി ചേർന്ന് ഭീമൻ സ്ട്രോബെറി രൂപപ്പെടാറുണ്ട്. എന്നാൽ ഒരെണ്ണം തന്നെ ഇത്ര വലുപ്പത്തിൽ വളരുന്നത് ഇതാദ്യമായാണ്. ഇത് വളരെ അധികം അത്ഭുതപ്പെടുത്തിയെന്ന് ഏരിയൽ പറയുന്നു. 2015ൽ ജപ്പാനിൽ നിന്നുള്ള ഒരു കർഷക വളർത്തിയ സ്ട്രോബെറിയുടെ റെക്കോർഡാണ് ഈ ഐലാൻ ഇനം തകർത്തത്. 250 ഗ്രാമായിരുന്നു പഴയ റെക്കോഡ്.
