അഹമ്മദാബാദ്: ഗുജറാത്തില് രാമനവമി ഘോഷയാത്രയ്ക്ക് നേരെ ആക്രമണം നടത്തിയവരുടെ അനധികൃത സ്വത്തുവകകള് നശിപ്പിച്ച സംഭവത്തില് സംസ്ഥാന സര്ക്കാരിനെതിരെ വിമര്ശനവുമായി ഗുജറാത്തിലെ കോണ്ഗ്രസ് പാര്ട്ടി. സംസ്ഥാന സര്ക്കാര് അനധികൃത സ്വത്തുവകകള് നശിപ്പിക്കുന്നത് നിയമ നടപടികളുടെ അടിസ്ഥാനത്തിലല്ലെന്നാണ് കോണ്ഗ്രസ് ആരോപണം. എന്നാല് കടകള് അനധികൃതമായി നിര്മ്മിച്ചതാണെന്നും, അവ കേന്ദ്രീകരിച്ച് നിയമവിരുദ്ധ പ്രവര്ത്തനങ്ങള് നടക്കുന്നതിന് തെളിവ് ലഭിച്ചിട്ടുണ്ടെന്നും പോലീസ് പറയുന്നു.
കോണ്ഗ്രസ് എം.എല്.എ ഗ്യാസുഡിങ് ഷെയ്ഖ്, ഇമ്രാന് ഖെദാവല എന്നിവരാണ് വിമര്ശനം ഉന്നയിച്ചത്. പൊളിക്കുന്നതിന് മുമ്പ് വസ്തുവകകളുടെ ഉടമകള്ക്ക് നോട്ടീസ് നല്കിയില്ലെന്നതാണ് മറ്റൊരു പ്രധാന ആരോപണം. കുറ്റാരോപിതര്ക്കെതിരെ പോലീസ് നിയമനടപടി തുടങ്ങിയതിന് ശേഷം മാത്രം കടകള് പൊളിച്ചാല് മതിയെന്നും ഇരുവരും പറയുന്നു. രാമനവമി ഘോഷയാത്ര ഖംഭാട്ട് മേഖലയിലെ ദര്ഗയ്ക്ക് സമീപത്ത് എത്തിയപ്പോഴായിരുന്നു ആക്രമണം. നൂറുകണക്കിന് ആക്രമണകാരികള് ദര്ഗയ്ക്കുള്ളില് നിന്നും ഇറങ്ങി വന്ന് ഘോഷയാത്രയ്ക്ക് നേരെ കല്ലേറ് നടത്തുകയായിരുന്നു. തുടര്ന്ന് പോലീസ് നടത്തിയ അന്വേഷണത്തില് കുറ്റക്കാരെ തിരിച്ചറിഞ്ഞിരുന്നു.
അതിന് ശേഷമാണ് ദര്ഗയ്ക്ക് സമീപത്ത് അനധികൃതമായി നിര്മ്മിച്ച ആറോളം കടകള് ബുള്ഡോസര് ഉപയോഗിച്ച് തകര്ത്തത്. കടകള് അനധികൃതമായി നിര്മ്മിച്ചതാണെന്നും, കടകള് വഴി നിയമവിരുദ്ധ പ്രവര്ത്തനങ്ങള് ഏകോപിപ്പിക്കുന്നുണ്ടെന്നും വിവരം ലഭിച്ചുവെന്നും പോലീസ് വ്യക്തമാക്കി. ആക്രമണം നടത്തിയതുമായി ബന്ധപ്പെട്ട് മൂന്ന് മൗലവിമാര് ഉള്പ്പെടെ മൂന്ന് പേരെ പോലീസ് അറസ്റ്റ് ചെയ്തിട്ടുണ്ട്. ആക്രമണം മുന്കൂട്ടി ആസൂത്രണം ചെയ്തതാണെന്നും, ഖംഭാട്ടിലെ സമാധാനവും മതസൗഹാര്ദവും തകര്ക്കാന് മൗലവിമാര് ശ്രമിച്ചുവെന്നും റിപ്പോര്ട്ടില് പറയുന്നു. ഇവര്ക്ക് വിദേശസഹായം ലഭിക്കുന്നതിലുള്പ്പെടെ പോലീസ് അന്വേഷണം നടക്കുന്നുണ്ട്.
Comments