ആരോഗ്യമേഖലയിൽ സമഗ്ര അഴിച്ചുപണിയുമായി യോഗി സർക്കാർ; എല്ലാ നിയമസഭാ മണ്ഡലങ്ങളിലും 100 കിടക്കകളുള്ള ആശുപത്രികൾ സ്ഥാപിക്കും

ഉത്തർപ്രദേശിലെ ആരോഗ്യമേഖലയെ ശക്തിപ്പെടുത്തലിന് ഊന്നൽ നൽകി യോഗി സർക്കാർ. അടുത്ത ആറ് മാസത്തിനുള്ളിൽ 10,000 പാരാമെഡിക്കുകളെ നിയമിക്കാനും അഞ്ച് വർഷത്തിനുള്ളിൽ 10,000 പുതിയ ആരോഗ്യ ഉപകേന്ദ്രങ്ങൾ സ്ഥാപിക്കാനുള്ള പദ്ധതിയിൽ പ്രാവർത്തിക്കമാകാനും ഉദ്യോഗസ്ഥർക്ക് നിർദ്ദേശം നൽകി. അടുത്ത രണ്ട് വർഷത്തിനുള്ളിൽ എല്ലാ നിയമസഭാ മണ്ഡലങ്ങളിലും 100 കിടക്കകളുള്ള ആശുപത്രികൾ ഒരുക്കുന്നതിനും ഇ-ഹോസ്പിറ്റലുകൾ ആരംഭിക്കുന്നതിനുമുള്ള പദ്ധതി തയ്യാറാക്കാൻ അദ്ദേഹം ഉദ്യോഗസ്ഥരോട് ആവശ്യപ്പെട്ടു.

പാരാമെഡിക്കൽ ജീവനക്കാരെ ‘ആരോഗ്യ സംവിധാനത്തിന്റെ നട്ടെല്ല്’ എന്ന് വിശേഷിപ്പിച്ച ആദിത്യനാഥ് ‘മഹാമാരിയുടെ് സമയത്ത് പാരാമെഡിക്കുകളുടെ പ്രാധാന്യം നമ്മൾ കണ്ടു. ആരോഗ്യ വകുപ്പ് അടുത്ത ആറ് മാസത്തിനുള്ളിൽ 10,000 പാരാമെഡിക്കുകളെ നിയമിക്കണം.’ യുപി സബോർഡിനേറ്റ് സർവീസ് സെലക്ഷൻ ബോർഡ് മുഖേന സുതാര്യമായ രീതിയിലായിരിക്കണം നിയമനങ്ങൾ നടത്തേണ്ടതെന്നും അദ്ദേഹം പറഞ്ഞു.

എല്ലാ നിയമസഭാ മണ്ഡലങ്ങളിലും ഘട്ടംഘട്ടമായി 100 കിടക്കകളുള്ള ആശുപത്രികൾ ആരംഭിക്കുന്നതിനുള്ള പദ്ധതി തയ്യാറാക്കാനും ആദിത്യനാഥ് ഉദ്യോഗസ്ഥർക്ക് നിർദ്ദേശം നൽകി. ഇ-ഹോസ്പിറ്റലുകളും സ്ഥാപിക്കുകയും ഇക്കാര്യത്തിൽ ഒരു പദ്ധതി തയ്യാറാക്കുകയും അടുത്ത രണ്ട് വർഷത്തിനുള്ളിൽ ഇത് ആരംഭിക്കുകയും ചെയ്യണമെന്നും അദ്ദേഹം പറഞ്ഞു. അഴിമതിരഹിത സംവിധാനത്തിന് ഊന്നൽ നൽകിയ മുഖ്യമന്ത്രി, മരുന്ന് വാങ്ങുന്നതിനുള്ള പരിപാടികളും എൻആർഎച്ച്എമ്മിന് കീഴിലുള്ളവയും അഴിമതിരഹിതമാക്കിയെന്നും ഇത് തുടരണമെന്നും പറഞ്ഞു.

അഴിമതിയുമായി ബന്ധപ്പെട്ട ഏത് പരാതിയും കർശനമായി കൈകാര്യം ചെയ്യണമെന്നും ആദിത്യനാഥ് പറഞ്ഞു. മന്ത്രിമാർ ഗ്രാമപ്രദേശങ്ങളിൽ സംഘടിപ്പിക്കുന്ന ‘ആരോഗ്യ ഫെയർ’ സന്ദർശിച്ച് അവരെ മികച്ചതാക്കുന്നതിനുള്ള നിർദ്ദേശങ്ങൾ സ്വീകരിക്കണമെന്നും അദ്ദേഹം പറഞ്ഞു. നഴ്സുമാരുടെയും ഡോക്ടർമാരുടെയും അനുപാതം 1:1 ആയിരിക്കണമെന്നും ആവശ്യമെങ്കിൽ യോഗ്യരായ പ്രൊഫഷണലുകളെ തസ്തികകൾ സൃഷ്ടിച്ച ശേഷം തിരഞ്ഞെടുക്കണമെന്നും ആദിത്യനാഥ് പറഞ്ഞു.

‘കഴിഞ്ഞ അഞ്ച് വർഷത്തിനുള്ളിൽ 5,000 ആരോഗ്യ ഉപകേന്ദ്രങ്ങൾ സ്ഥാപിച്ചു. അടുത്ത അഞ്ച് വർഷത്തിനുള്ളിൽ 10,000 പുതിയ സബ് സെന്ററുകൾ തുറക്കുകയാണ് ഞങ്ങളുടെ ലക്ഷ്യം. ഓരോ ജില്ലയിലും സൗജന്യ ഡയാലിസിസ് സൗകര്യത്തിന് ഊന്നൽ നൽകണം. സിടി സ്‌കാൻ, ബേൺ സ്റ്റെബിലൈസേഷൻ യൂണിറ്റ്, ബേൺ കെയർ യൂണിറ്റുകൾ വർദ്ധിപ്പിക്കണം. അടുത്ത രണ്ട് വർഷത്തിനുള്ളിൽ എല്ലാ ജില്ലകളിലും അത്തരം സൗകര്യങ്ങൾ ഉണ്ടായിരിക്കണം.

ഡെങ്കിപ്പനി, മലേറിയ, ചിക്കുൻഗുനിയ, സിക വൈറസ്, ജാപ്പനീസ് മസ്തിഷ്‌ക ജ്വരം, വെക്റ്റർ പകരുന്ന രോഗങ്ങൾ തുടങ്ങിയ രോഗങ്ങൾക്കായി ‘മിഷൻ സീറോ’ ആരംഭിക്കാൻ അദ്ദേഹം ഉദ്യോഗസ്ഥരോട് നിർദ്ദേശിച്ചു. അതിന്റെ പ്രവർത്തനം വികേന്ദ്രീകരിക്കാൻ നിർദ്ദേശിക്കുന്ന 108 ആംബുലൻസ് സേവനങ്ങൾ കാര്യക്ഷമമാക്കണം.

300 അവശ്യമരുന്നുകളുടെ ലഭ്യത ഉറപ്പാക്കുക, ജില്ലകളിൽ ഒരു ആദ്യ റഫറൽ യൂണിറ്റ് കൂടി ആരംഭിക്കുക, എല്ലാ ജില്ലയിലും ഡ്രഗ് ഹൗസുകൾ സ്ഥാപിക്കുക, ലക്നൗവിലെ കെജിഎംയുവിൽ ക്ഷയരോഗത്തിന്റെ മികവിന്റെ കേന്ദ്രം സ്ഥാപിക്കുക, ശ്യാമപ്രസാദ് മുഖർജി ആശുപത്രി വിപുലീകരിക്കുക തുടങ്ങിയ നിർദേശങ്ങളും ആദിത്യനാഥ് പുറപ്പെടുവിച്ചു.

20,000 അങ്കണവാടി വർക്കർമാരുടെ നിയമനം അടുത്ത ആറുമാസത്തിനകം പൂർത്തിയാക്കണമെന്നും ഓരോ വർക്കർക്കും സഹായിക്കും രണ്ട് സാരി വീതം നൽകണമെന്നും അങ്കണവാടികളിൽ മൂന്ന് മുതൽ ആറ് വയസ്സുവരെയുള്ള കുട്ടികൾക്ക് പാകം ചെയ്ത ഭക്ഷണവും പോഷകാഹാരവും നൽകണമെന്നും മുഖ്യമന്ത്രി പറഞ്ഞു. പാലും പഴങ്ങളും പോലെയുള്ള പ്രഭാതഭക്ഷണങ്ങളും നൽകണം.

‘ഒരു ജില്ല ഒരു മെഡിക്കൽ കോളേജ്’ പദ്ധതിയിൽ ഇനി 14 ജില്ലകൾ മാത്രമേ ശേഷിക്കുന്നുള്ളൂ, മുൻഗണനാക്രമത്തിൽ ഈ ജില്ലകളിൽ പൂർത്തിയാക്കണമെന്ന് മുഖ്യമന്ത്രി പറഞ്ഞു. തത്സമയ അടിയന്തര നിരീക്ഷണ സംവിധാനമുള്ള ആദ്യ സംസ്ഥാനം ഉത്തർപ്രദേശായിരിക്കുമെന്നും ഇതിനായി മൊബൈൽ ആപ്പും കമാൻഡ് കോൾ സെന്ററും ആരംഭിക്കണമെന്നും അദ്ദേഹം പറഞ്ഞു.

ആയുഷ് സർവകലാശാലയിൽ യോഗ, നാച്ചുറൽ മെഡിസിൻ എന്നിവ നിയന്ത്രിക്കുന്നതിന് പുതിയ നയം രൂപീകരിക്കാനും ആദിത്യനാഥ് ഉദ്യോഗസ്ഥർക്ക് നിർദ്ദേശം നൽകി, അടുത്ത രണ്ട് വർഷത്തിനുള്ളിൽ അയോധ്യയിൽ ആയുർവേദ കോളേജും ഹോമിയോ കോളേജും വാരണാസിയിൽ പഞ്ച്കർമ്മ, യോഗ, നാച്ചുറൽ മെഡിസിൻ കോട്ടേജും ആരംഭിക്കാൻ ആവശ്യപ്പെട്ടു.