ബ്യൂണസ് ഐറിസ്: 2026 ഫിഫ ലോകകപ്പിന് പിന്നാലെ അര്ജന്റീനന് സൂപ്പര്താരം ലയണല് മെസിയുടെ അന്താരാഷ്ട്ര കരിയര് അവസാനിക്കുമെന്ന സൂചനകള് ശക്തമാകുന്നു. ലോകകപ്പ് ഫൈനലില് സ്പെയിനിനോട് അര്ജന്റീന പരാജയപ്പെട്ടതിന് പിന്നാലെ ദേശീയ ടീമിനൊപ്പമുള്ള മെസിയുടെ ഭാവിയെക്കുറിച്ചുള്ള ചര്ച്ചകള് സജീവമായിരിക്കുകയാണ്.
39-ാം വയസ്സിലും പ്രായത്തെ വെല്ലുവിളിച്ച പ്രകടനമാണ് മെസി ലോകകപ്പില് കാഴ്ചവെച്ചത്. എട്ട് ഗോളുകളും നാല് അസിസ്റ്റുകളും സ്വന്തമാക്കിയ അദ്ദേഹം ഗോള്വേട്ടക്കാരുടെ പട്ടികയില് രണ്ടാം സ്ഥാനത്തെത്തി. ടൂര്ണമെന്റിലുടനീളം അര്ജന്റീനയെ നയിച്ച മെസി ഫൈനല് വരെ ടീമിനെ എത്തിക്കുന്നതിലും നിര്ണായക പങ്കുവഹിച്ചു.
ഫൈനലിന് ശേഷം ഭാവി പദ്ധതികളെക്കുറിച്ച് പ്രതികരിക്കാന് മെസി തയ്യാറായിരുന്നില്ല. മെസി ആഗ്രഹിക്കുന്നിടത്തോളം ദേശീയ ടീമില് തുടരുമെന്ന് പരിശീലകന് ലയണല് സ്കലോണി വ്യക്തമാക്കിയിരുന്നെങ്കിലും, അര്ജന്റീനന് മാധ്യമങ്ങള് പുറത്തുവിടുന്ന റിപ്പോര്ട്ടുകള് വ്യത്യസ്ത ചിത്രമാണ് നല്കുന്നത്. അടുത്ത ലോകകപ്പ് കളിക്കാനുള്ള പദ്ധതിയില്ലെന്നും അര്ജന്റീനയ്ക്കായി ഇനി കുറച്ച് മത്സരങ്ങള് മാത്രം കളിച്ചശേഷം വിരമിക്കല് പ്രഖ്യാപിക്കാനാണ് മെസി ആലോചിക്കുന്നതെന്നുമാണ് റിപ്പോര്ട്ടുകള്.
അര്ജന്റീന ഫുട്ബോള് അസോസിയേഷന് മെസിക്കായി പ്രത്യേക വിടവാങ്ങല് മത്സരം സംഘടിപ്പിക്കുന്നതും പരിഗണിക്കുന്നതായി റിപ്പോര്ട്ടുകളുണ്ട്. രാജ്യത്തിന്റെ എക്കാലത്തെയും മികച്ച താരത്തിന് അര്ഹമായ ആദരവോടെ യാത്രയയപ്പ് നല്കാനാണ് അസോസിയേഷന്റെ ആലോചന.
വര്ഷങ്ങളോളം വിമര്ശനങ്ങള് നേരിട്ടെങ്കിലും അര്ജന്റീന ഫുട്ബോളിന്റെ ഏറ്റവും വിജയകരമായ കാലഘട്ടത്തിന് നേതൃത്വം നല്കാന് മെസിക്ക് സാധിച്ചു. രണ്ട് കോപ്പ അമേരിക്ക കിരീടങ്ങളും ഒരു ലോകകപ്പ് കിരീടവും രാജ്യത്തിന് സമ്മാനിച്ച അദ്ദേഹം, ഇത്തവണയും ടീമിനെ ലോകകപ്പ് ഫൈനലിലെത്തിച്ച് തന്റെ മികവ് വീണ്ടും തെളിയിച്ചു.
ഫൈനല് തോല്വിക്ക് ശേഷം സമൂഹമാധ്യമങ്ങളില് പങ്കുവെച്ച കുറിപ്പില്, ‘ഈ വേദന ആഴമേറിയതാണ്. ഈ മുറിവുണങ്ങാന് ഏറെ സമയം വേണ്ടിവരും. പക്ഷേ തുടര്ച്ചയായി രണ്ടാം ലോകകപ്പ് ഫൈനല് കളിച്ച ടീമാണിതെന്ന് ആരും മറക്കരുത്’ എന്ന് മെസി കുറിച്ചു.
ഫൈനലിന് മുന്പ് ടീമിനൊപ്പമുള്ള ചിത്രം പങ്കുവെച്ച് എഴുതിയ വൈകാരിക കുറിപ്പും വിരമിക്കല് അഭ്യൂഹങ്ങള്ക്ക് കൂടുതല് ശക്തി പകര്ന്നിരുന്നു. ‘ഈ ടീമിനൊപ്പം ചെലവഴിച്ച ഓരോ ദിവസവും വിലപ്പെട്ടതാണ്. ഫൈനലിന്റെ ഫലം എന്തായാലും ഈ ടീം ഇതിനകം ചരിത്രം സൃഷ്ടിച്ചുകഴിഞ്ഞു,’ എന്നായിരുന്നു അന്ന് മെസി കുറിച്ചത്.
