കൊച്ചി: ആലപ്പുഴ ജില്ലാ കളക്ടർ ഡോ. രേണുരാജും ആരോഗ്യ വകുപ്പ് ജോയിന്റ് സെക്രട്ടറിയും കേരള മെഡിക്കൽ സർവ്വീസ് കോർപ്പറേഷൻ എംഡിയുമായ ഡോ. ശ്രീറാം വെങ്കിട്ടരാമനും വിവാഹിതരായി. ചോറ്റാനിക്കരയിലെ ഓഡിറ്റോറിയത്തിലായിരുന്നു വിവാഹച്ചടങ്ങ്. അടുത്ത ബന്ധുക്കളും സുഹൃത്തുക്കളും മാത്രമാണ് പങ്കെടുത്തത്. എംബിബിഎസ് ബിരുദം പൂർത്തിയാക്കിയതിന് ശേഷമാണ് ശ്രീറാം വെങ്കിട്ടരാമനും രേണു രാജും സിവിൽ സർവീസിലേക്ക് എത്തുന്നത്.
ശ്രീറാം വെങ്കിട്ടരാമൻ മെഡിക്കൽ സർവ്വീസ് കോർപ്പറേഷൻ എംഡിയാണ്. ആലപ്പുഴ ജില്ലാ കളക്ടറാണ് രേണു രാജ്. ശ്രീറാമിന്റെ ആദ്യ വിവാഹവും രേണുവിന്റെ രണ്ടാം വിവാഹവുമാണിത്. 2012ൽ രണ്ടാം റാങ്കോടെയാണ് ശ്രീറാം സിവിൽ പരീക്ഷയിൽ വിജയിക്കുന്നത്. 2014ൽ ആദ്യ ശ്രമത്തിൽ രണ്ടാം റാങ്കോടെയാണ് രേണു രാജ് സിവിൽ സർവ്വീസ് പരീക്ഷ പാസായത്.
കോട്ടയം സ്വദേശിനിയാണ് രേണു രാജ്. തൃശൂർ സബ് കളക്ടറായാണ് ആദ്യ നിയമനം. ദേവികുളം സബ്കളക്ടറായി ആദ്യം ശ്രീറാമും പിന്നീട് രേണുവും അനധികൃത കയ്യേറ്റങ്ങൾക്കെതിരെ സ്വീകരിച്ച നടപടികളും ഏറ്റുമുട്ടലും കേരളത്തിൽ ചർച്ചയായിരുന്നു. മാദ്ധ്യമപ്രവർത്തകന്റെ കൊലപാതകത്തിൽ കുറ്റാരോപിതനായ ശ്രീറാം വെങ്കിട്ടരാമൻ സസ്പെന്ഷനിലായിരുന്നു.
