മോസ്‌കോ: റഷ്യയുടെ വിക്ടറി ഡേ മെയ് 9ന് ആഘോഷിക്കാനിരിക്കേ യുക്രെയ്‌ന് എതിരായുള്ള യുദ്ധം മയപ്പെടുത്തില്ലെന്ന് റഷ്യ. മെയ് 9ന് മുമ്പ് യുദ്ധം അവസാനിപ്പിക്കുമെന്ന വാർത്തകൾ റഷ്യൻ വിദേശകാര്യമന്ത്രി സെർഗേ ലാവ്‌റോവ് തള്ളി.
യുക്രെയ്‌നിൽ ശക്തമായ മുന്നേറ്റം നടത്താൻ തന്നെയാണ് തീരുമാനം. മെയ് 9ന് കണക്കാക്കി യുദ്ധം നിർത്താൻ യാതൊരു തീരുമാനവുമില്ല. അതേസമയം സാധാരണക്കാർക്കുണ്ടാകുന്ന നഷ്ടങ്ങൾ പരമാവധി കുറയ്‌ക്കാൻ ശ്രമിക്കും. എന്നാൽ യുക്രെയ്ൻ സൈന്യത്തോടുള്ള ഏറ്റമുട്ടൽ തുടരുക തന്നെ ചെയ്യും. ചില പ്രത്യേക മേഖലകളിൽ മുന്നേറ്റം കുറയ്‌ക്കുമെന്ന വാർത്തകൾ തെറ്റാണെന്നും സെർഗേ ലാവ്‌റോവ് പറഞ്ഞു.
റഷ്യൻ പ്രസിഡന്റ് പുടിന്റെ പ്രസ്താവനയിൽ ഒരുമാറ്റവുമില്ലെന്നും യുക്രെയ്‌ന്റെ മണ്ണിൽ വിദേശ ശക്തികൾ പ്രവേശിച്ചാൽ അത് ഒരിക്കലും അംഗീകരിക്കില്ലെന്നും ശക്തമായ തിരിച്ചടി യുക്രെയ്‌ന് പുറത്തേക്കും നൽകുമെന്നും ലാവ്‌റോവ് ചൂണ്ടിക്കാട്ടി.
