ന്യൂഡൽഹി: ലോകസമാധാനമാണ് മാനവരാശിയുടെ പുരോഗതിയുടെ അടിസ്ഥാനമെന്നും ബുദ്ധഭഗവാന്റെ പ്രപഞ്ച തത്വം വിശ്വശാന്തിക്കായുള്ളതാണെന്നും ആഗോള ബുദ്ധ സന്യാസി സമൂഹം ആഹ്വാനം ചെയ്തു. ബുദ്ധപൂർണ്ണിമയോടനുബന്ധിച്ചാണ് സന്യാസി സമൂഹം ലോകസമാധാന ആഹ്വാനം നടത്തിയത്.
അന്താരാഷ്ട്ര ബുദ്ധിസ്റ്റ് കോൺഫഡറേഷനാണ് വീഡിയോ സന്ദേശങ്ങളിലൂടെ ലോകരാഷ്ട്രങ്ങളിലടക്കം സമാധാന സന്ദേശം നൽകിയത്. ഇന്ത്യയിൽ സാംസ്കാരിക മന്ത്രാലയവുമായി സഹകരിച്ച് നടന്ന ബുദ്ധപൂർണ്ണിമ പരിപാടിയിൽ ധർമ്മശാലയടക്കമുള്ള ബുദ്ധ വിഹാരങ്ങളിലെ ദലായ് ലാമ അടക്കമുള്ള ആചാര്യന്മാരാണ് വിവിധ ഭാഷകളിൽ ബുദ്ധപൂർണ്ണിമ സന്ദേശം നൽകിയത്. കംബോഡിയ, കൊറിയ എന്നിവിടങ്ങളിൽ നിന്നുള്ള സന്ദേശവും അനുയായികളിലേയ്ക്ക് എത്തി.
‘നമ്മൾ വൈശാഖ ശുക്ലപക്ഷത്തിൽ ഭഗവാൻ ശ്രീബുദ്ധന്റെ ഓർമ്മകളിലാണ്. മാനവ സമൂഹത്തിന് ശാന്തിയും സമാധാനവും ഐശ്വര്യവും പ്രദാനം ചെയ്ത മതമാണ് ബുദ്ധമതം. ഈ നൂറ്റാണ്ടിൽ അനുഭവിക്കാത്ത ദുരിതകാലമാണ് കൊറോണയുടേത്. അതുണ്ടാക്കിയത് അപ്രതീക്ഷിത തകർച്ചകളാണെന്ന് എല്ലാവരും തിരിച്ചറിയുന്നു.’ ദലായ് ലാമ പറഞ്ഞു.
ലോകത്തിന്റെ വിവിധ ഭാഗങ്ങളിൽ മനുഷ്യവംശം ആഗ്രഹിക്കുന്ന യുദ്ധമാണ് നടക്കുന്നത്. മനുഷ്യന്റെ വികാരങ്ങൾ അതിതീവ്രമായി മാറുകയാണ്. ഇതെല്ലാം വലിയ സംഘർഷത്തിലേക്ക് നീങ്ങിയിരിക്കുന്നു. നമുക്ക് ഈ കാലഘട്ടത്തിൽ ബുദ്ധഭഗവാന്റെ വചനങ്ങൾ പിന്തുടരുകമാത്രമാണ് നല്ല മാർഗ്ഗമെന്നും ലാമ പറഞ്ഞു.
