ജക്കാർത്ത: ഏഷ്യാകപ്പ് ഹോക്കിയിൽ ഇന്ത്യക്ക് മെഡലോടെ മടക്കം. ജപ്പാനെ 1-0ന് തോൽപ്പി ച്ചാണ് ഏഷ്യാ കപ്പിൽ ഇന്ത്യൻ പുരുഷ താരങ്ങൾ മെഡൽ സ്വന്തമാക്കിയത്. ഫൈനലിൽ സെമി ഫൈനലിൽ ഇന്ത്യയെ മറികടന്ന ദക്ഷിണ കൊറിയ മലേഷ്യയെയാണ് നേരിടുക.
ശക്തമായ മത്സരത്തിൽ ആദ്യ ക്വാർട്ടറിൽ തന്നെ ഇന്ത്യ മുന്നിലെത്തി. 7-ാം മിനിറ്റിൽ രാജ് കുമാർ പാലാണ് ഗോൾ നേടിയത്. കരുതലോടെയാണ് ഇന്ത്യൻ നിര നീങ്ങിയത്. മധ്യനിരയിൽ ശ്രദ്ധയോടെ നീങ്ങിയ കാർത്തി സെൽവം എടുത്ത പാസ് വിഷ്ണുകാന്തിനാണ് നൽകിയത്. എന്നാൽ ജപ്പാൻ പ്രതിരോധ നിര സമർത്ഥമായി ആദ്യ നീക്കം തടയുകയായിരുന്നു. എന്നാൽ തൊട്ടുപുറകേ ഉത്തം സിംഗ് വലതു വിംഗിൽ നിന്നും നൽകിയ പന്തുമായി അതിവേഗം മുന്നേറിയ രാജ് കുമാർ പാൽ ഇന്ത്യക്ക് 1-0ന്റെ നിർണ്ണായക ലീഡ് നൽകുകയായിരുന്നു.
സെമിഫൈനലിൽ കൊറിയ 4-4ന് ഇന്ത്യയെ സമനിലയിൽ പിടിച്ചതോടെയാണ് ഫൈനൽ കാണാനാകാതെ പോയത്. ഗോൾ ശരാശരിയുടെ മികവിലാണ് കൊറിയ മുന്നേറിയത്. ഇതിനെ തുടർന്നാണ് ഇന്ത്യ വെങ്കലത്തിനായി ജപ്പാനെതിരെ പൊരുതേണ്ടിവന്നത്.
