രാജ്യത്തെ 2 ലക്ഷം ഗ്രാമങ്ങളിൽ ത്രിവർണ പതാക ഉയർത്തും, ഒരു കോടി വൃക്ഷതൈകൾ നടും :എബിവിപി

ന്യൂഡൽഹി: രാജ്യത്തെ 2 ലക്ഷം ഗ്രാമങ്ങളിൽ ത്രിവർണ പതാക ഉയർത്തും. വിദ്യാർത്ഥികളും വികസനത്തിന്റെ ഭാഗമാകുന്നു എന്ന ആശയ പ്രചരണത്തിനായി ഒരു കോടി വൃക്ഷത്തൈകൾ നടാനും എബിവിപി പദ്ധതിയിട്ടിട്ടുണ്ട്. ഇതിനായി ജൂൺ 5 മുതൽ വൃക്ഷതൈകൾ വിതരണം ചെയ്ത് തുടങ്ങും.അടുത്തിടെ ഷിംലയിൽ നടന്ന അഖില ഭാരതീയ വിദ്യാർത്ഥി പരിഷത്തിന്റെ ത്രിദിന ദേശീയ എക്‌സിക്യൂട്ടീവ് കൗൺസിൽ യോഗത്തിലാണ് തീരുമാനങ്ങൾ എടുത്തത്. എബിവിപി ദേശീയ ജനറൽ സെക്രട്ടറി നിധി ത്രിപാഠി വാർത്താസമ്മേളനത്തിൽ ഇക്കാര്യം അറിയിച്ചു. സ്വാതന്ത്ര്യത്തിന്റെ  അമൃത് മഹോത്സവത്തിന്റെ ഭാഗമായി എബിവിപി പ്രവർത്തകർ സ്വാതന്ത്ര്യ ദിനത്തിൽ രാജ്യത്തെ ഒരു ലക്ഷം ഗ്രാമങ്ങളിൽ പതാക ഉയർത്തിയിരുന്നു.

സംഘടനയെ ശക്തിപ്പെടുത്തുന്നതിന്റെ ഭാഗമായി സെപ്തംബർ മാസത്തിൽ എബിവിപി സെൽഫി വിത്ത് ക്യാമ്പസ് യൂണിറ്റ് കാമ്പെയ്‌നും ആരംഭിക്കും. എബിവിപി മുഖപത്രമായ ഛാത്രശക്തിയുടെ രജിസ്‌ട്രേഷൻ ഒരു ലക്ഷമായി ഉയർത്താനാണ് ലക്ഷ്യമിടുന്നത്. രാജ്യത്തുടനീളമുള്ള രക്തദാതാക്കളുടെ പട്ടിക തയ്യാറാക്കാനും സംഘടന തീരുമാനിച്ചിട്ടുണ്ട്.

എബിവിപി അതിന്റെ 75-ാം വർഷത്തിലേക്ക് കടക്കാൻ പോകുന്നു, അതിന്റെ ഭാഗമായി സംഘടനയെ കൂടുതൽ ശക്തിപ്പെടുത്തുന്നതിന് വിശദമായ പ്രവർത്തന പദ്ധതി തയ്യാറാക്കിയിട്ടുണ്ട്, നിധി ത്രിപാഠി പറഞ്ഞു. സർവ്വകലാശാലകളിൽ സംസ്ഥാന സർക്കാരുകളുടെ ഇടപെടൽ വർധിപ്പിക്കുക, വിദ്യാഭ്യാസ സ്ഥാപനങ്ങളുടെ സ്വയംഭരണാവകാശം കുറയ്‌ക്കുക, ദേശീയ വിദ്യാഭ്യാസ നയം വേഗത്തിൽ നടപ്പാക്കുക, രാജ്യത്തുടനീളം നടപ്പാക്കുക, സ്വാശ്രയ ഇന്ത്യ എന്നീ പ്രമേയങ്ങളും ദേശീയ കൗൺസിൽ അവതരിപ്പിച്ചു.  അഖില ഭാരതീയ വിദ്യാർത്ഥി പരിഷത്തിന്റെ അടുത്ത പ്രവർത്തക സമിതി യോഗം ഓഗസ്റ്റ് 6,7 തീയതികളിൽ ഒഡീഷയിലും ദേശീയ കൺവെൻഷൻ നവംബർ 24,27 തീയതികളിൽ ജയ്പൂരിലും നടക്കുമെന്ന് നേതാക്കൾ അറിയിച്ചു.