ഡൽഹി: രാജ്യത്ത് വീണ്ടും കൊവിഡ് കേസുകളുടെ എണ്ണം വർദ്ധിക്കുന്നു. പുതുതായി 4270 കൊറോണ കേസുകൾ കൂടി രേഖപ്പെടുത്തി. രാജ്യത്ത് ഇതുവരെ റജിസ്റ്റർ ചെയ്ത കൊറോണ കേസുകൾ 4,31,76,817 ആണ്. 34 ദിവസത്തിന് ശേഷം പ്രതിദിന പോസിറ്റിവിറ്റി നിരക്ക് ഒരു ശതമാനത്തിന് മുകളിൽ രേഖപ്പെടുത്തിയതായി കേന്ദ്ര ആരോഗ്യ മന്ത്രാലയം പറയുന്നു.
നിലവിൽ രാജ്യത്തെ ആകെ കൊവിഡ് കേസുകളുടെ എണ്ണം 24,052 ആയി. 24 മണിക്കൂറിൽ റിപ്പോർട്ട് ചെയ്തത് 15 മരണങ്ങളാണ്. ഇതോടെ ആകെ മരണസംഖ്യ 5,24,692 ആയി. അതേസമയം, 98.73 ശതമാനമാണ് രാജ്യത്തെ രോഗമുക്തി നിരക്കെന്നും കേന്ദ്ര ആരോഗ്യമന്ത്രാലയം ഔദ്യോഗികമായി വ്യക്തമാക്കുന്നു.
കഴിഞ്ഞ ദിവസത്തെ പ്രതിദിന കണക്കുകളെ താരതമ്യം ചെയ്തു നോക്കുമ്പോൾ രാജ്യത്ത് ഒരു ദിവസം കൊണ്ട് കൂടിയത് 1636 കേസുകളാണ്. ഏറ്റവും കൂടുതൽ കേസുകൾ റിപ്പോർട്ട് ചെയ്തിരിക്കുന്നത് മഹാരാഷ്ട്ര, കേരളം എന്നിവിടങ്ങളിലാണ്. സംസ്ഥാനങ്ങൾക്ക് കേന്ദ്ര സർക്കാർ ജാഗ്രത നിർദ്ദേശം നൽകി. മുംബൈ നഗരത്തിൽ മാത്രം കഴിഞ്ഞ 24 മണിക്കൂറിൽ രേഖപ്പെടുത്തിയത് 889 പുതിയ കേസുകളാണ്. കൊറോണ നാലാം തരംഗം വരാൻ സാധ്യതയുള്ളതിനാൽ ജാഗ്രത ശക്തമാക്കാനാണ് നിർദ്ദേശം.
