ബോംബെ: ഒരു ദിവസം കൊണ്ട് 190 കേസുകളില്‍ വാദം കേട്ട് ബോംബെ ഹൈക്കോടതി ജസ്റ്റിസ് എസ് എസ് ഷിന്‍ഡെ. രാവിലെ 10.30 ന് കോടതി മുറിയിലെത്തിയ അദ്ദേഹം വാദം കേള്‍ക്കല്‍ പൂര്‍ത്തിയാക്കി മടങ്ങിയത് രാത്രി 8 മണിക്കാണ്. 200 ല്‍ അധികം കേസുകള്‍ കേള്‍ക്കാന്‍ ഉണ്ടായിരുന്നതായി ബെഞ്ച് റിപ്പോര്‍ട്ട് ചെയ്തു.
ജഡ്ജിയുടെ ആത്മാര്‍ത്ഥതയെ അഭിനന്ദിച്ച് കേന്ദ്ര നിയമമന്ത്രി കിരണ്‍ റിജ്ജിജു രംഗത്തെത്തി. എസ്എസ് ഷിന്‍ഡെയുടെ ചേംബറിന്റെ ചിത്രം സഹിതം പങ്കുവെച്ചാണ് കേന്ദ്രമന്ത്രി ട്വിറ്ററിലൂടെ അഭിനന്ദനം അറിയിച്ചത്. തന്നെ ഏറെ സന്തോഷിപ്പിക്കുന്ന വാര്‍ത്തയാണിതെന്നും മന്ത്രി പറഞ്ഞു.
സാധാരണയായി 10.30 മുതല്‍ 4.30 വരെയാണ് കോടതി സമയം. അര്‍ധ രാത്രി വരെ വാദം കേള്‍ക്കുന്നത് അസാധാരണ കേസുകളില്‍ മാത്രമാണ്,എന്നാല്‍ ഒരു ദിവസം തന്നെ 190 കേസുകള്‍ കേള്‍ക്കുന്നത് ആദ്യമാണ്. അടുത്തിടെ വിരമിച്ച ജസ്റ്റിസ് എസ് ജെ കത്താവാല 150 കേസുകളില്‍ വാദം കേട്ടിരുന്നു. ബോംബെ ഹൈക്കോടതിയിലെ മൂന്നാമത്തെ മുതിര്‍ന്ന ജഡ്ജാണ് ജസ്റ്റിസ് എസ് എസ് ഷിന്‍ഡെ. രാജസ്ഥാന്‍ ഹൈക്കോടതി ചീഫ് ജസ്റ്റിസ് പദവിയിലേക്ക് സുപ്രീം കോടതി നാമനിര്‍ദേശം ചെയ്തിട്ടുണ്ട്.
