ശ്രീനഗർ: അമർനാഥ് യാത്രയ്ക്ക് ദിവസങ്ങൾ ബാക്കി നിൽക്കെ ഭീകരാക്രമണ ഭീഷണിയുമായി ലഷ്കർ ഇ ത്വയ്ബ. അമർനാഥ് യാത്രയ്ക്കായി കശ്മീർ താഴ്വരയിൽ എത്തുന്നവരെ വധിക്കുമെന്നാണ് ഭീകര സംഘടനയുടെ ഭീഷണി. സംഭവത്തിന്റെ പശ്ചാത്തലത്തിൽ അതീവ ജാഗ്രതാ നിർദ്ദേശം പുറപ്പെടുവിച്ചു.
നിലവിൽ അമർനാഥ് യാത്രയുടെ സുരക്ഷാ സജ്ജീകരണങ്ങൾ പൂർത്തിയായി. ഇതിനിടെയാണ് പുതിയ ഭീഷണിയുമായി ലഷ്കർ ഭീകരർ രംഗത്തുവന്നിരുന്നത്. ‘സംഘി ആശയവുമായി അമർനാഥ് യാത്രയ്ക്ക് എത്തുന്നവരെ വകവരുത്തും. രണ്ട് ലക്ഷത്തിലധികം പേർ അമർനാഥ് യാത്രയ്ക്കായി എത്തുമെന്ന കാര്യം തങ്ങൾക്കറിയാം. അമർനാഥ് യാത്രയ്ക്കെത്തുന്നവരെ നേരിടാനുള്ള എല്ലാ സജ്ജീകരണങ്ങളും തങ്ങൾ നടത്തിയിട്ടുണ്ടെന്നും ലഷ്കർ ഇ ത്വയ്ബയുടെ ഭീഷണിയിൽ പറയുന്നു.
അമർനാഥ് യാത്രയ്ക്കായുള്ള മുന്നൊരുക്കങ്ങൾ ആരംഭിച്ചപ്പോഴും സമാനമായ രീതിയിൽ ഭീകര സംഘടനയുടെ ഭീഷണി ഉയർന്നിരുന്നു. ലഷ്കർ ഇ ത്വയ്ബയുടെ സഹസംഘടനയായ ദി റസിസ്റ്റന്റ് ഫ്രണ്ട് ആയിരുന്നു ഭീഷണിയുമായി രംഗത്തുവന്നിരുന്നത്. ഈ മാസം 30നാണ് അമർനാഥ് യാത്രയ്ക്ക് തുടക്കമാകുന്നത്.
