ശ്രീനഗർ : രണ്ട് പോലീസ് ഉദ്യോഗസ്ഥരെ കൊലപ്പെടുത്തിയ ഭീകരനെ വകവരുത്തി കശ്മീർ പോലീസ്. ശ്രീനഗറിലെ സൗരയിൽ നടന്ന ഏറ്റുമുട്ടലിലാണ് കൊടുഭീകരനെ പോലീസ് വധിച്ചത്. കശ്മീർ ഐജിപി ഇക്കാര്യം സ്ഥിരീകരിച്ചു.
ലഷ്‌കർ ഭീകരൻ ആദിൽ പരേയെയാണ് പോലീസ് വകവരുത്തിയത്. ജമ്മു കശ്മീർ പോലീസ് ഉദ്യോഗസ്ഥരായിരുന്ന ജി ഹസൻ ദാർ, സൈഫുള്ള ഖാദ്രി എന്നിവരെ കൊലപ്പെടുത്തുകയും 9 വയസ്സുള്ള പെൺകുട്ടിയെ പരിക്കേൽപ്പിക്കുകയും ചെയ്ത സംഭവത്തിലെ മുഖ്യസൂത്രധാരനാണ് ഇയാൾ. ചെറിയ പോലീസ് സംഘവുമായുള്ള ഏറ്റുമുട്ടലിലാണ് ഭീകരൻ കൊല്ലപ്പെട്ടത്.
ഈ വർഷം താഴ്‌വരയിലെ 100 ഭീകരരെ വധിച്ചതായും ഐജിപി അറിയിച്ചു. ജനുവരി മുതലുള്ള കണക്കുകൾ പ്രകാരമാണ് പോലീസ് വിവരങ്ങൾ പുറത്തുവിട്ടത്. എന്നാൽ ആദിലിനെ കൊലപ്പെടുത്തിയതിന് പിന്നാലെ ഇതിന് പ്രതികാരം ചോദിക്കുമെന്ന് അറിയിച്ചുകൊണ്ട് ലഷ്‌കർ ഇ ത്വായ്ബ പ്രസ്താവന പുറത്തുവിട്ടിട്ടുണ്ട്.
