ന്യൂഡൽഹി: രാജ്യത്ത് 5ജി ഇന്റർനെറ്റ് സേവനം ലഭ്യമാക്കുന്നതിനുള്ള നടപടികൾ വേഗത്തിലാക്കി കേന്ദ്ര സർക്കാർ. സ്പെക്ട്രം ലേലത്തിൽ പങ്കെടുക്കുന്നതിനുള്ള മാനദണ്ഡങ്ങൾ ഉൾപ്പെടുത്തി കേന്ദ്ര ടെലികോം മന്ത്രാലയം നോട്ടീസ് പുറത്തിറക്കി. എസ് എം ആർ എ പ്രകാരമുള്ള ഇ-ലേലമായിരിക്കും നടക്കുക.
സ്പെക്ട്രത്തിലെ 72097.85 മെഗാ ഹേർട്ട്സ് ആണ് ലേലത്തിന് വെക്കുക. ഇരുപത് വർഷത്തേക്കാണ് സ്പെക്ട്രം ലേലം ചെയ്യുന്നത്. ലേലത്തിലൂടെ നേടിയെടുക്കുന്ന സ്പെക്ട്രം പത്ത് വർഷത്തിന് ശേഷം മാത്രമേ സറണ്ടർ ചെയ്യാൻ സാധിക്കൂ.
ലേലത്തിലൂടെ നേടിയെടുക്കുന്ന സ്പെക്ട്രത്തിന് പ്രത്യേക ഉപയോഗ നിരക്കുകൾ ഉണ്ടായിരിക്കില്ല. ലേലത്തിൽ പങ്കെടുക്കുന്നവർ ഫിനാൻഷ്യൽ ബാങ്ക് ഗ്യാരണ്ടിയും പെർഫോമൻസ് ബാങ്ക് ഗ്യാരണ്ടിയും ഹാജരാക്കണം. ഇരുപത് തുല്യ ഗഡുക്കളായാണ് ലേലം നേടിയെടുക്കുന്നവർ പണം അടയ്ക്കേണ്ടത്. 7.72 ശതമാനം പലിശ നിരക്കിൽ എൻപിവി സംരക്ഷിച്ചായിരിക്കണം തുക അടയ്ക്കേണ്ടത്. 600 മെഗാ ഹേർട്ട്സ്, 700 മെഗാ ഹേർട്ട്സ്, 800 മെഗാ ഹേർട്ട്സ്, 900 മെഗാ ഹേർട്ട്സ്, 1800 മെഗാ ഹേർട്ട്സ്, 2100 മെഗാ ഹേർട്ട്സ്, 2300 മെഗാ ഹേർട്ട്സ്, 2500 മെഗാ ഹേർട്ട്സ്, 3300 മെഗാ ഹേർട്ട്സ്, 26 ജിഗാ ഹേർട്ട്സ് ബാൻഡുകളിൽ ലഭ്യമായ എല്ലാ സ്പെക്ട്രവും ലേലത്തിന്റെ ഭാഗമായിരിക്കും എന്ന് നോട്ടീസിൽ പറയുന്നു.
രാജ്യത്ത് 6 ജി സേവനങ്ങൾ വൈകാതെ ആരംഭിക്കുമെന്ന് പ്രധാന മന്ത്രി നരേന്ദ്ര മോദി വ്യക്തമാക്കി. ലേലത്തിൽ സീറോ സ്പെക്ട്രം ഉപയോഗ നിരക്കുകൾ ഉൾപ്പെടെ 2021 ൽ പ്രഖ്യാപിച്ച പരിഷ്കാരങ്ങളും കമ്പനികൾക്ക് പ്രയോജനപ്പെടുത്താം. 5ജി സേവനങ്ങൾ നിലവിൽ വരുന്നതോടെ രാജ്യത്തെ ഇന്റർനെറ്റ് വേഗത 10 മടങ്ങായി വർദ്ധിക്കുമെന്നാണ് റിപ്പോർട്ട്.
