അഗ്നിപഥ് പ്രതിഷേധം കാരണം ട്രെയിൻ യാത്ര മുടങ്ങിയോ?; ടിക്കറ്റ് തുക തിരികെ നേടുന്നത് എങ്ങനെയെന്ന് നോക്കാം

ന്യൂഡൽഹി: കേന്ദ്രസർക്കാർ നടപ്പിലാക്കാനൊരുങ്ങുന്ന അഗ്നിപഥ് പദ്ധതിക്കെതിരായി ആസൂത്രിതമായ അക്രമങ്ങളാണ് രാജ്യത്തിന്റെ പലഭാഗങ്ങളിലും നടക്കുന്നത്. പ്രതിഷേധമെന്ന വ്യാജേന തെരുവിലിറങ്ങിയ യുവാക്കൾ കോടിക്കണക്കിന് രൂപയുടെ പൊതുമുതലാണ് നശിപ്പിച്ചത്. ഇന്ത്യൻ റെയിൽവേയ്‌ക്ക് മാത്രം 2000 കോടിയുടെ നാശനഷ്ടമാണ് ഉണ്ടാക്കിയത്. പ്രതിഷേധം 369 സർവീസുകളെയാണ് ബാധിച്ചത്.ഇതിൽ 159 ലോക്കൽ പാസഞ്ചർ ട്രെയിനുകളും ,210 മെയിൽ / എക്സ്പ്രസും ഉൾപ്പെടുന്നു. നിരവധി ട്രെയിനുകൾ റദ്ദാക്കാൻ നിർബന്ധിതരായിരിക്കുകയാണ് റെയിൽവേ. എന്നാൽ ടിക്കറ്റുകൾ ബുക്ക് ചെയ്തവർക്ക് പണം തിരികെ നൽകുമെന്ന് ഉറപ്പ് നൽകിയിരിക്കുകയാണ് റെയിൽവേ.

ഓൺലൈനായാണ് ടിക്കറ്റ് ബുക്ക് ചെയ്തതെങ്കിൽ ടിക്കറ്റ് റീഫണ്ട് സ്വയമേ ലഭിക്കും.നിങ്ങൾ ടിഡിആർ (ടിക്കറ്റ് ഡെപ്പോസിറ്റ് രസീത്) ഫയൽ ചെയ്യേണ്ടതില്ല. പണം നേരിട്ട് അക്കൗണ്ടിൽ എത്തും.

നിങ്ങളുടെ ട്രെയിൻ 3 മണിക്കൂറിൽ കൂടുതൽ വൈകുകയോ ട്രെയിൻ റദ്ദാക്കപ്പെടുകയോ ചെയ്താലും ടിക്കറ്റിന്റെ തുക തിരികെ ലഭിക്കും.

എന്നാൽ, റെയിൽവേ ടിക്കറ്റ് കൗണ്ടറുകളിൽ നിന്ന് ടിക്കറ്റ് എടുത്തവർ പണം തിരികെ ലഭിക്കുന്നതിന് ടിഡിആർ ഫയൽ ചെയ്യണം. TDR ഫയൽ ചെയ്യുന്ന രീതി നോക്കാം

കൗണ്ടർ ടിക്കറ്റ് റദ്ദാക്കാനായി TDR ഇപ്രകാരം ഫയൽ ചെയ്യുക

1. നിങ്ങൾ ആദ്യം https://www.operations.irctc.co.in/ctcan/SystemTktCanLogin.jsf എന്നതിൽ ക്ലിക്ക് ചെയ്യുക .

2. ഈ ലിങ്കിൽ നിങ്ങളുടെ PNR നമ്പർ, ട്രെയിൻ നമ്പർ, ക്യാപ്ച കോഡ് എന്നിവ നൽകുക.

3. തുടർന്ന് നിയമങ്ങൾ ടിക്ക് ചെയ്യുക.

4. ഫോം പൂരിപ്പിക്കുമ്പോൾ നിങ്ങൾ നൽകിയ നമ്പറിൽ ഒരു OTP ലഭിക്കും. ഇത് നൽകുക.

5. നിങ്ങൾക്ക് PNR-ന്റെ മുഴുവൻ വിവരങ്ങളും ദൃശ്യമാകും.

6. റീഫണ്ട് ഓപ്ഷനിൽ ക്ലിക്ക് ചെയ്യുക.

6. ഒരു സ്ഥിരീകരണ സന്ദേശം (Confirmation Message) ദൃശ്യമാകും.

7. ബാങ്ക് അക്കൗണ്ട് വിവരങ്ങൾ നൽകുക, നിങ്ങൾക്ക് പണം തിരികെ ലഭിക്കും.