പ്രമുഖ എഡിറ്ററായ ഡോൺമാക്സ് സംവിധാനം ചെയ്യുന്ന അറ്റ് സിനിമയുടെ ടീസർ പുറത്ത് വന്നതോടെ നമ്മളിൽ ചിലരെങ്കിലും കൗതുകത്തോടെ ശ്രദ്ധിച്ച ഒന്നാണ് റെഡ് വി റാപ്റ്റർ. മമ്മൂട്ടി ഈ ക്യാമറ പരിശോധിക്കുന്നതിന്റെ ചിത്രം വൈറലായതോടെയാണ് മലയാളികൾ ഇതിനെ കാര്യമായി ശ്രദ്ധിക്കുന്നത്.
ക്യാമറ പ്രേമികൾക്ക് പരിചിതമാണെങ്കിലും റെഡ് വി റാപ്റ്റർ എന്നത് മലയാളികൾക്കിടയിൽ അത്ര സുപരിചിതനല്ല. അത് കൊണ്ട് തന്നെ കഴിഞ്ഞ കുറച്ച് ദിവസമായി മലയാളി തിരഞ്ഞുകൊണ്ടിരിക്കുന്നത് റെഡ് വി റാപ്റ്റർ എന്താണെന്നാണ്.
ഹോളിവുഡ് സിനിമകളിൽ ഉപയോഗിക്കുന്ന അൾട്രാ സ്ലോമോഷൻ ക്യാമറയാണ് റെഡ് വി റാപ്റ്റർ. അമേരിക്ക ആസ്ഥാനമായി പ്രവർത്തിക്കുന്ന കമ്പനിയാണ് റെഡ് ഡിജിറ്റൽ സിനിമ.പ്രൊഫഷണൽ സിനിമ ക്യാമറയുടെ നിർമ്മാണ രംഗത്ത് എന്നും വലിയ മാറ്റങ്ങൾക്ക് വഴിയൊരുക്കിയിട്ടുള്ള കമ്പനിയായ റെഡ് ആണ് വി റാപ്റ്റിന്റെ നിർമ്മാതാക്കൾ. ഹോളിവുഡ് സിനിമകളിൽ താരമായി മാറിയ റെഡ് വി റാപ്റ്റർ മോളിവുഡ്ഡിലും തരംഗമാകുകയാണ്.
അറിയാം റെഡ് റാപ്റ്റിന്റെ സ്പെഷ്യൽ എഡിഷനെ കുറിച്ച് ………………
വി റാപ്റ്റര് ഒരു അൾട്രാ സ്ലോ മോഷന് ക്യാമറയാണ്. നിരവധി അത്യാധുനിക ഫീച്ചറുകളുമായാണ് വി റാപ്റ്റിന്റെ സ്പെഷ്യല് എഡിഷന് ക്യാമറ വി റാപ്റ്റർ 8K യുടെ വരവ്. ഏറ്റവും വേഗമേറിയ സ്കാൻ ടൈം ഉള്ള സിനിമ ക്യാമറ എന്ന് പേരുള്ള റാപ്റ്ററിന് 600 ഫ്രെയിംസ് സ്ലോ മോഷൻ R3D റോ ഫോർമാറ്റിൽ ചിത്രീകരിക്കാൻ സാധിക്കും. മറ്റുള്ള സ്ലോ മോഷൻ ക്യാമറകൾ 68.1 ബില്യൺ കളർ ഷെയ്ഡുകൾ പകർത്തുമ്പോൾ റാപ്റ്ററിന് 281 ട്രില്യൺ ഷെയ്ഡുകൾ പകർത്താൻ സാധിക്കും.
8K റെസൊല്യൂഷനിലുളള വിസ്ത വിഷൻ സെൻസർ ആണ് ക്യാമറക്കുള്ളത്. ഇത് ഫുൾ ഫ്രെയിം സെൻസറിലും വലിപ്പമേറിയതാണ്. 17+ ഉയർന്ന ഡൈനാമിക് റേഞ്ചും പരിഷ്കരിച്ച കളർ സയൻസ് , തെർമൽ മെക്കാനിസം എന്നിവയും റാപ്റ്ററിനുണ്ട്. കൂടാതെ, 5Ghz , സ്ട്രെയിറ്റ് മൊബൈൽ ട്രാൻസ്മിഷൻ ടെക്നോളജിയും ആർട്ടിഫിഷ്യൽ ഇന്റലിജൻസ് അടിസ്ഥാനമാക്കിയുള്ള ഓട്ടോ ഫോക്കസും ഇതിലുണ്ട്.
2021ന്റെ ആരംഭത്തിൽ വി റാപ്റ്റർ 8K അവതരിപ്പിക്കാനായിരുന്നു റെഡ് തീരുമാനിച്ചിരുന്നത് എന്നാൽ, കോവിഡിന്റെ പശ്ചാത്തലത്തിൽ ചിപ്പ് നിർമാണം നിലച്ചതിനെ തുടർന്ന് ഇത് നീണ്ടു പോകുകയായിരുന്നു. എന്തായാലും മലയാള സിനിമാ ലോകത്ത് ദൃശ്യവിസ്മയം തീർക്കാൻ ഇനി റെഡ് വി റാപ്റ്റർ ക്യാമറയും ഉണ്ടാകും
