തിരുവനന്തപുരം: കേരള ഭാഗ്യക്കുറി വകുപ്പിന്റെ ചരിത്രത്തിലെ ഏറ്റവും ഉയർന്ന സമ്മാനത്തുകയുമായി ഇത്തവണത്തെ തിരുവോണം ബമ്പർ ഭാഗ്യക്കുറി നാളെ (ജൂലൈ 16) പുറത്തിറങ്ങും. മുഖ്യമന്ത്രി വി.ഡി. സതീശൻ മുഖ്യമന്ത്രിയുടെ ഓഫീസ് ചേംബറിൽ നടക്കുന്ന ചടങ്ങിൽ ടിക്കറ്റിന്റെ ഔദ്യോഗിക പ്രകാശനം നിർവഹിക്കും.
30 കോടി രൂപയാണ് ഇത്തവണത്തെ ഒന്നാം സമ്മാനം. കേരള ഭാഗ്യക്കുറി ചരിത്രത്തിലെ ഏറ്റവും വലിയ ഒന്നാം സമ്മാനമാണിത്. കൂടാതെ 20 പേർക്ക് ഒരു കോടി രൂപ വീതം രണ്ടാം സമ്മാനവും, 20 പേർക്ക് 25 ലക്ഷം രൂപ വീതം മൂന്നാം സമ്മാനവും, 10 പേർക്ക് അഞ്ച് ലക്ഷം രൂപ വീതം നാലാം സമ്മാനവും, 10 പേർക്ക് രണ്ട് ലക്ഷം രൂപ വീതം അഞ്ചാം സമ്മാനവും ലഭിക്കും. ഇതിന് പുറമെ 5000 രൂപ മുതൽ 500 രൂപ വരെ ലക്ഷക്കണക്കിന് സമ്മാനങ്ങളും ഉൾപ്പെടുത്തിയിട്ടുണ്ട്.
ഒന്നാം സമ്മാനാർഹമായ ടിക്കറ്റ് വിറ്റഴിക്കുന്ന ഏജന്റിന് മൂന്ന് കോടി രൂപയുടെ ഏജൻസി കമ്മീഷൻ നൽകും. 500 രൂപയാണ് ടിക്കറ്റിന്റെ വില.
പ്രകാശനച്ചടങ്ങിൽ നികുതി വകുപ്പ് അഡീഷണൽ ചീഫ് സെക്രട്ടറി കെ.ആർ. ജ്യോതിലാൽ, ഭാഗ്യക്കുറി വകുപ്പ് ഡയറക്ടർ അഞ്ജു കെ.എസ്, അഡീഷണൽ ഡയറക്ടർമാരായ ഷാജു പി.എ, അനിൽകുമാർ കെ.എസ് തുടങ്ങിയവർ പങ്കെടുക്കും.
ടിക്കറ്റ് വിൽപ്പന അടുത്ത തിങ്കളാഴ്ച മുതൽ ആരംഭിക്കും. അച്ചടിച്ച പേപ്പർ ടിക്കറ്റുകൾ അംഗീകൃത ഏജന്റുമാരിൽ നിന്നോ വിൽപ്പനക്കാരിൽ നിന്നോ മാത്രം വാങ്ങണമെന്ന് ഭാഗ്യക്കുറി വകുപ്പ് അറിയിച്ചു. സോഷ്യൽ മീഡിയ, ഡിജിറ്റൽ പേയ്മെന്റ് ലിങ്കുകൾ, ഓൺലൈൻ പ്ലാറ്റ്ഫോമുകൾ എന്നിവ വഴി ടിക്കറ്റ് വിൽപ്പന ഉണ്ടായിരിക്കില്ല എന്നും മുന്നറിയിപ്പ് നൽകിയിട്ടുണ്ട്.
ഇത്തവണത്തെ തിരുവോണം ബമ്പർ നറുക്കെടുപ്പ് സെപ്റ്റംബർ 26-നാണ് നടക്കുക.
