ന്യൂഡൽഹി: എൻഡിഎയുടെ രാഷ്ട്രപതി സ്ഥാനാർത്ഥി ദ്രൗപദി മുർമുവിനെതിരെ അപകീർത്തികരമായ പരാമർശം നടത്തിയതിന് ചലച്ചിത്ര നിർമ്മാതാവും സംവിധായകനുമായ രാം ഗോപാൽ വർമ്മയ്ക്കെതിരെ ബിജെപി പരാതി നൽകി. ദ്രൗപദി മുർമുവിനെതിരായ അധിക്ഷേപ ട്വീറ്റിനെതിരെയാണ് പരാതി. ദ്രൗപദി പ്രസിഡന്റായാൽ പാണ്ഡവരും കൗരവരും ആരാകുമെന്നായിരുന്നു പരാമർശം. ‘ ദ്രൗപദിയാണ് രാഷ്ട്രപതിയാകുന്നതെങ്കിൽ ആരാകും പാണ്ഡവർ, അതിലുപരിയായി ആരാകും കൗരവർ’ ഇതായിരുന്നു ട്വീറ്റ്.
അധിക്ഷേപ ട്വീറ്റിനെതിരെ തെലങ്കാനയിൽ നിന്നുള്ള മുതിർന്ന ബിജെപി നേതാവ് നാരായൺ റെഡ്ഡിയാണ് പോലീസിൽ പരാതി നൽകിയത്. പിന്നോക്ക വിഭാഗങ്ങളെ അപമാനിച്ചുവെന്ന് പരാതിയിൽ ചൂണ്ടിക്കാണിക്കുന്നു. ട്വീറ്റിലെ പരാമർശങ്ങൾ അങ്ങേയറ്റം അപകീർത്തികരമാണെന്ന് അദ്ദേഹം തന്റെ പരാതിയിൽ പറയുന്നു. ബിജെപി എംഎൽഎ ടി രാജാ സിംഗും രാം ഗോപാൽ വർമ്മയ്ക്കെതിരെ രൂക്ഷ വിമർശനവുമായി രംഗത്തെത്തിയിട്ടുണ്ട്. മദ്യലഹരിയിലാണ് രാം ഗോപാൽ വർമ്മ ഇത്തരം ട്വീറ്റുകൾ ചെയ്യുന്നതെന്ന് രാജ സിംഗ് പറഞ്ഞു. വിവാദ പരാമർശങ്ങൾ നടത്തി വാർത്തകളിൽ നിറയാനാണ് അയാളുടെ ശ്രമം. രാം ഗോപാൽ വർമ്മയ്ക്കെതിരെ ക്രിമിനൽ കേസ് രജിസ്റ്റർ ചെയ്യണമെന്നും രാജ സിംഗ് ആവശ്യപ്പെട്ടു.
എന്നാൽ ആരേയും വേദനിപ്പിക്കാൻ ഉദ്ദേശിച്ചിരുന്നില്ലെന്ന് രാം ഗോപാൽ വർമ്മ പറഞ്ഞു. ‘ ട്വീറ്റ് ആരേയും വേദനിപ്പിക്കാൻ ഉദ്ദേശിച്ച് ഉള്ളതായിരുന്നില്ല. ആക്ഷേപഹാസ്യം എന്ന രീതിയിലായിരുന്നു ആ ട്വീറ്റ്. മഹാഭാരതത്തിലെ ദ്രൗപദി എന്റെ പ്രിയപ്പെട്ട കഥാപാത്രമാണ്. പേര് വളരെ അപൂർവ്വമായതിനാൽ, ആ കഥാപാത്രത്തെയാണ് പെട്ടന്ന് ഓർമ്മ വന്നത്. അല്ലാതെ ആരുടേയും വികാരത്തെ വ്രണപ്പെടുത്താൻ ഉദ്ദേശിച്ചിരുന്നില്ലെന്നും’ രാം ഗോപാൽ വർമ്മ ട്വീറ്റ് ചെയ്തു.
