കൊച്ചി: അമ്മ ഒരു ക്ലബാണെന്ന ഇടവേള ബാബു വിന്റെ പ്രഖ്യാപനം തെറ്റെന്ന് നടനും എം എൽ എയുമായ ഗണേഷ് കുമാർ. ഇടവേള ബാബുവിന്റെ പ്രഖ്യാപനം ഞെട്ടലുണ്ടാക്കി. ചാരിറ്റബിൾ സംഘടനയായി ആണ് അമ്മ പ്രവർത്തനം തുടങ്ങിയത്. ബാർ സൗകര്യത്തോടുള്ള ക്ലബായി ഇതിനെ മാറ്റിയോ ? അത്തരത്തിൽ മാറ്റം വരുത്തിയോ എന്ന് ഇടവേള ബാബുവും മോഹൻലാലും വ്യക്തമാക്കണമെന്നും അദ്ദേഹം പറഞ്ഞു.
താരസംഘടന അമ്മയുടെ സെക്രട്ടറിയായ ഇടവേള ബാബു കഴിഞ്ഞ ദിവസമാണ് ‘ അമ്മ ‘ ക്ലബാണ് എന്ന പ്രസ്താവന നടത്തിയത്. ഇതിനെതിരെയാണ് ഗണേഷ് കുമാർ പ്രതികരിച്ചിരിക്കുന്നത്. ആരോപണവിധേയൻ 8 ക്ലബിലെ അംഗം, അവിടെയൊന്നും നടപടിയില്ല എന്ന് അമ്മ പറയുന്നത് ആർക്കുവേണ്ടിയാണ്.ക്ലബാണെന്ന് ഇടവേള ബാബു പറഞ്ഞപ്പോൾ പ്രസിഡന്റ് തിരുത്തണമായിരുന്നു എന്നും അദ്ദേഹം കൂട്ടിച്ചേർത്തു.
ഇതിന് പുറമെ ‘അമ്മയുടെ എക്സിക്യൂട്ടീവ് അംഗങ്ങൾ പണം പറ്റി ആരോപിതന് വേണ്ടി പ്രവർത്തിക്കുന്നു എന്ന് അതിജീവത ആരോപിച്ചിരുന്നു.
ഈ ആരോപണത്തിൽ വിശദീകരണം നൽകാൻ അമ്മ ഭാരവാഹികൾ തയാറാകണം. അല്ലാത്ത പക്ഷം മോഹൻലാൽ അടക്കം സംശയത്തിന്റെ നിഴലിലാകുമെന്നും ഗണേഷ് കുമാർ പറഞ്ഞു.
താൻ കത്തു നൽകിയപ്പോഴും മറുപടി നൽകിയിട്ടില്ലെന്ന് പറഞ്ഞ അദ്ദേഹം പാർവ്വതിയും ശ്വേതാമേനോനും എന്തിന് രാജിവച്ചു എന്നും ചോദിച്ചു.
പീഡനക്കേസിൽ കോടതി വിധി വരുന്നതിന് മുൻപ് നടൻ വിജയ് ബാബുവിനെ അമ്മയിൽ നിന്ന് പുറത്താക്കാൻ സാധിക്കില്ലെന്നായിരുന്നു കഴിഞ്ഞ ദിവസം ഇടവേള ബാബു അറിയിച്ചത്.കോടതി വിധി വരുന്നതിന് മുൻപ് എടുത്തുചാടി തീരുമാനം എടുക്കാൻ സാധിക്കില്ലെന്നും , അമ്മ ഒരു ക്ലബ് മാത്രമാണ്, വിജയ് ബാബു അംഗമായ മറ്റ് ക്ലബുകൾ അദ്ദേഹത്തെ പുറത്താക്കിയിട്ടില്ലെന്നും അദ്ദേഹം പറഞ്ഞിരുന്നു.
Comments