ഓർമ്മകളെ മറ്റൊരിടത്തേക്ക് പകർത്തി സൂക്ഷിക്കാൻ ഇഷ്ടപ്പെടുന്നവരാണ് നമ്മളിലധികവും. അത് കൊണ്ട് ഇന്നൊരു കഥയാകാം. സാധാരണ കഥയല്ല. ഇതൊരു ക്യാമറാ കഥയാണ്. കഥയറിയും മുൻപേ ഒരു ചോദ്യമായാലോ? നമ്മുടെ സുന്ദര മുഹൂർത്തങ്ങളെ ഒപ്പിയെടുക്കുന്ന ക്യാമറകളിൽ ഏറ്റവും വിലയേറിയത് ഏതായിരിക്കും? പല ഉത്തരങ്ങളാണല്ലേ മനസിൽ തെളിയുന്നത്. ശരിയുത്തരമറിയാൻ ആരും ഗൂഗിളിൽ തിരയാൻ പോകണ്ട. ഇന്നത്തെ കഥ ലോകത്തിലെ ഏറ്റവും വിലയേറിയ ആ ക്യാമറയെ കുറിച്ചാണ്.
അടുത്തിടെ നടന്ന ‘ലൈറ്റ്സ് ഫോട്ടോഗ്രാഫികാ’ ലേലത്തിൽ ഒരു ക്യാമറ ലേലത്തിൽ വച്ചു ആ ക്യാമറയ്ക്ക് എല്ലവരും പ്രതീക്ഷിച്ചത് 22 മുതൽ 33 വരെ ലക്ഷം ഡോളർ ലഭിക്കുമെന്നായിരുന്നു. എന്നാൽ, ലൈക്ക 0-സീരീസ് നമ്പർ 105 ‘ഒസ്കർ ബർണാക്’ (Leica 0-Series ‘Oskar Barnack’) എന്ന ക്യാമറ വിറ്റു പോയത്
ആർക്കും വിശ്വസിക്കാൻ പറ്റാത്ത വിലയ്ക്കാണ്. എത്രയാണെന്നല്ലേ? ആരും ഞെട്ടണ്ട – 1.5 കോടി ഡോളറിനാണ് ലൈക്ക 0-സീരീസ് നമ്പർ 105 ‘ഒസ്കർ ബർണാക് ലേലത്തിൽ വിറ്റത്. ഇത്ര വില കിട്ടാൻ മാത്രം എന്താണ് ഈ ക്യാമറയുടെ പ്രത്യേകതകൾ എന്നല്ലേ?
ചരിത്രം ഉറങ്ങുന്ന ക്യാമറാ ബോഡിയാണ് എന്നതാണ് ഇതിന്റെ ഏറ്റവും വലിയ സവിശേഷത. അതിന്റെ ഫീച്ചറുകൾക്കല്ല വില മറിച്ച് ക്യാമറകളുടെയും ഫോട്ടോഗ്രഫിയുടെയും ചരിത്രം വഴിതിരിച്ചുവിട്ടു എന്നതടക്കമുള്ള കാരണങ്ങളാണ് ലേലത്തിൽ ഈ ക്യാമറയ്ക്ക് ഇത്ര വില ലഭിക്കാൻ കാരണമായത്.
ചരിത്രം വഴിതിരിച്ചു വിട്ട ക്യാമറ എന്നൊക്കെ പറയുമ്പോൾ നിങ്ങൾ ആലോചിക്കുന്നുണ്ടാകും എന്താകും ആ ചരിത്രമെന്ന്
ഒസ്കർ ബാർണക്ക് എന്ന ലൈക്ക കമ്പനി ഉടമ എടുത്ത ഒരു തീരുമാനമാണ് ഫോട്ടോഗ്രഫിയുടെയും ക്യാമറാ നിർമാണത്തിന്റെയും ഗതി മാറ്റിയത് എന്നാണ് പറയപ്പെടുന്നത്. ഒസ്കർ തന്റെ ലൈക്ക-1 സീരീസ് നിർമ്മിക്കാൻ തീരുമാനിക്കുന്നതിനു മുൻപുള്ള കാലഘട്ടത്തിൽ കൊണ്ടുനടക്കാനോ ട്രൈപ്പോഡില്ലാതെ ഫോട്ടോ എടുക്കാനോ എളുപ്പമല്ലാത്ത ക്യാമറകളുടേതായിരുന്നു. അങ്ങനെയിരിക്കെയാണ് സിനിമ ഷൂട്ട് ചെയ്യാൻ ഉപയോഗിക്കുന്ന 35 എംഎം ഫിലിം ഉപയോഗിച്ച്, വലുപ്പം കുറഞ്ഞ ഒരു ക്യാമറ നിർമ്മിക്കാൻ ഒസ്കർ തീരുമാനിക്കുന്നത്. പലരും ഓസ്ക്കറിനെ കളിയാക്കി ശരിക്കുള്ള ക്യാമറകൾക്കു പകരം ഒരു കളിപ്പാട്ടമാണ് നിങ്ങൾ നിർമ്മിക്കുന്നത് എന്നായിരുന്നു പലരും പരിഹസിച്ചത് എന്നാൽ അദ്ദേഹം തന്റെ ക്യാമറ നിർമ്മാണവുമായി മുന്നോട്ടുപോയി.
ഏകദേശം നൂറു വർഷം മുൻപ്, 1923 ൽ ആണ് ചരിത്രം വഴിതിരിച്ചുവിട്ട ആ ലൈക്ക 1 സീരീസ് ക്യാമറകൾ പുറത്തുവന്നത് എന്നാൽ അതിനു മുൻപ് ഒസ്കറിന്റെ കമ്പനി പരീക്ഷണാർഥം 23 ക്യാമറകൾ പുറത്തിറക്കിയിരുന്നു അവയ്ക്കാണ് ലൈക്ക 0-സീരീസ് ക്യാമറകൾ എന്ന പേരു ലഭിച്ചത്. ഇവയിൽ ഏകദേശം 12 എണ്ണം ഇപ്പോഴും ലോകത്തിന്റെ വിവിധ ഭാഗങ്ങളിലായി ഉണ്ടാക്കാമെന്നു കരുതപ്പെടുന്നു. ഇപ്പോൾ ലോകത്തെ ഏറ്റവും വിലപിടിപ്പുള്ള ക്യാമറ എന്ന വിശേഷണം കിട്ടിയ ലൈക്ക 0-സീരീസ് നമ്പർ 105 ‘ഒസ്കർ ബർണാക്’ മോഡലിന്റെ മുകളിൽ ഒസ്കർ ബാർണക് എന്ന പേര് കൊത്തിവച്ചിട്ടുണ്ട്.
1.5 കോടി ഡോളർ മുടക്കി ക്യാമറ ലേലത്തിൽ പിടിച്ചയാൾ താൻ വാങ്ങിയ ക്യാമറ ഉപയോഗിച്ച് ഫോട്ടോ എടുക്കാനല്ല അത് ലേലത്തിൽപിടിച്ചത് മറിച്ച് ചരിത്രത്തിന്റെ ഭാഗമായ ക്യാമറ സ്വന്തമാക്കിവയ്ക്കാൻ മാത്രമാണ് . ഇതിനു മുൻപ് 2018 ൽ നടത്തിയ ലേലത്തിൽ വിറ്റു പോയ മറ്റൊരു ലൈക്ക 0-സീരീസ് ക്യാമറയ്ക്കു ലഭിച്ചത് 24 ലക്ഷം യൂറോയാണ് ആ റെക്കോർഡാണ് ലൈക്ക 0-സീരീസ് നമ്പർ 105 ‘ഒസ്കർ ബർണാക്’ഇപ്പോൾ തകർത്തിരിക്കുന്നത് അതേസമയം ലൈക്ക 0-സീരീസ് നമ്പർ 105 ‘ഒസ്കർ ബർണാക്’ മാത്രമല്ല ലേലത്തിന് എത്തിയ ക്യാമറ മറ്റ് 400 ക്യാമറകളും ‘ലൈറ്റ്സ് ഫോട്ടോഗ്രാഫികാ’ ലേലത്തിൽ ഉണ്ടായിരുന്നു.
Comments