പലവലിപ്പത്തിലുള്ള ക്യാമറകൾ കണ്ടവരും ഉപയോഗിച്ചവരുമായിരിക്കും നമ്മളിൽ പലരും. ഉപ്പുതരിയോളം വലിപ്പമുള്ള ഒരു ക്യാമറ ഉണ്ടെന്ന് പറഞ്ഞാൽ നിങ്ങൾ വിശ്വസിക്കുമോ? ഇല്ലല്ലേ എന്നാൽ ഇപ്പോളിതാ ഉപ്പുതരിയോളം വലിപ്പമുള്ള ഒരു ക്യാമറ കണ്ടുപിടിച്ചിരിക്കുകയാണ് ശാസ്ത്രജ്ഞർ.ഈ ഇത്തിരി കുഞ്ഞൻ ക്യാമറയുടെ പേരാണ് മെറ്റാസർഫസ്.
മെറ്റാസർഫസ് (metasurface) ഉപ്പ് തരിയോളം മാത്രം വലുപ്പമുള്ള ക്യാമറയാണ് . ഈ ക്യാമറയിൽ നിന്നുള്ള വളരെ വ്യക്തമായ കളർ ചിത്രങ്ങൾ പുറത്തുവിട്ടിരിക്കുകയാണ് ശാസ്ത്രജ്ഞർ.500000 മടങ്ങു വലുപ്പമുള്ള സാധാരണ ഒപ്റ്റിക്കൽ ക്യാമറയിൽ നിന്നും കിട്ടുന്ന അതേ വ്യക്തതയാണ് ഈ ചെറു ക്യാമറയും തരുന്നത്.
സാധാരണ ക്യാമറകളിലെ ഗ്ലാസ് ലെൻസുകൾക്കുപകരം നാനോ അളവിലുള്ള 1.6 ദശലക്ഷം സിലണ്ട്രിക്കൽ പോസ്റ്റുകളാണ് മെറ്റാസർഫസ് ക്യാമറയിൽ ചിത്രങ്ങൾ ശേഖരിക്കാൻ ഉപയോഗിക്കുന്നത്. 100 നാനോ മീറ്റർ ആണ് സിലിക്കൺ നൈട്രേഡ് ഉപയോഗിച്ച് നിർമിച്ച ഓരോ പോസ്റ്റിന്റെയും വലിപ്പം. എല്ലാ കോണുകളിൽ നിന്നും ഉള്ള കാഴ്ചകൾ സ്വീകരിക്കുവാൻ പ്രത്യേക രീതിയിലാണ് ഈ നാനോ പോസ്റ്റുകളുടെ ക്രമീകരണം.
മറ്റുള്ള ക്യാമറകളിൽ പ്രകാശ ധ്രുവീകരണത്തിന് ലെൻസുകൾ ഉപയോഗിക്കുമ്പോൾ ഇവിടെ നാനോ പോസ്റ്റുകൾ ധ്രുവീകരണം എളുപ്പമാക്കുന്നു. ആർട്ടിഫിഷ്യൽ ഇന്റലിജൻസിന്റെ സഹായത്തോടെ പ്രകാശവുമായുള്ള പോസ്റ്റുകളുടെ ഇടപെടലുകൾ സംയോജിപ്പിച്ച് വ്യക്തതയുള്ള ചിത്രങ്ങൾ സൃഷ്ടിച്ചെടുക്കുകയും ചെയ്യുന്നു. ന്യൂറൽ നാനോ-ഒപ്റ്റിക്സ് എന്നറിയപ്പെടുന്ന ഈ വിദ്യ ഏറ്റവും പ്രയോജനപ്രദമാകുന്നത് മനുഷ്യശരീരത്തിനുള്ളിലെ ചിത്രങ്ങൾ പകർത്താനും പ്രശ്നങ്ങൾ മനസ്സിലാക്കാനുമാണ്. എൻഡോസ്കോപ്പി, ബ്രെയിൻ ഇമേജിങ് പോലെയുള്ള രോഗനിർണയ രീതികൾ കൂടുതൽ കാര്യക്ഷമമാക്കാൻ മെറ്റാസർഫസ് ക്യാമറകൾ സഹായിക്കും.
ന്യൂറൽ നാനോ-ഒപ്റ്റിക്സ് അടിസ്ഥാനമാക്കിയുള്ള സെൻസറുകൾ ഭാവിയിൽ സ്മാർട്ട്ഫോൺ, സെക്യൂരിറ്റി, റോബോട്ടിക്സ്, ഓട്ടോണോമസ് ഡ്രൈവിങ് തുടങ്ങി പല മേഖലകളിലും സ്ഥാനം പിടിച്ചേക്കാം.പ്രിൻസ്റ്റൺ യൂണിവേഴ്സിറ്റിയിലെയും വാഷിംഗ്ടൺ യൂണിവേഴ്സിറ്റിയിലെയും ശാസ്ത്രജ്ഞരാണ് ഒരു ഉപ്പിന്റെ വലിപ്പമുള്ള മെറ്റാസർഫസ് വികസിപ്പിച്ചെടുത്തതിന്റെ പിന്നിൽ
Comments