സൂററ്റ്: പ്രവാചക പരാമർശത്തിൽ വിവാദത്തിലായ ബിജെപി മുൻ വക്താവ് നുപൂർ ശർമ്മയുടെ ചിത്രം ഇൻസ്റ്റഗ്രാമിൽ അപ് ലോഡ് ചെയ്തതിന് വ്യവസായിക്ക് വധഭീഷണി. ഗുജറാത്തിലെ സൂററ്റിലാണ് സംഭവം. അമ്യൂസ്‌മെന്റ് പാർക്ക് നടത്തുന്ന വ്യവസായിക്ക് നേരെയാണ് ഭീഷണി ഉണ്ടായത്.
അമ്യൂസ്‌മെന്റ് പാർക്കിന്റെ പേജിലാണ് നുപൂർ ശർമ്മയുടെ ചിത്രം അപ് ലോഡ് ചെയ്തത്. സ്ഥാപനത്തിന്റെ സോഷ്യൽ മീഡിയ പേജുകൾ കൈകാര്യം ചെയ്യുന്ന മാർക്കറ്റിംഗ് വിഭാഗമാണ് അബദ്ധത്തിൽ ഫോട്ടോ അപ് ലോഡ് ചെയ്തത്. ചിത്രം ഉടൻ ഡിലീറ്റ് ചെയ്യുകയും ചെയ്തിരുന്നു. എന്നിട്ടും ഇൻസ്റ്റഗ്രാമിലൂടെ നിരന്തരം വധഭീഷണിയെത്തിയതോടെയാണ് പോലീസിൽ പരാതി നൽകിയത്.
സംഭവത്തിൽ മൂന്ന് പേരെ അറസ്റ്റ് ചെയ്തതായി പോലീസ് അറിയിച്ചു. മൊഹമ്മദ് അയാൻ അതാഷ്ബാജിവാല, റാഷിദ് ബുര, ആലിയ മുഹമ്മദ് എന്നിവരാണ് അറസ്റ്റിലായത്. എല്ലാവരും സൂററ്റ് സ്വദേശികളാണെന്ന് പോലീസ് പറഞ്ഞു. ഉമ്ര പോലീസ് സ്‌റ്റേഷനിലാണ് കേസ് രജിസ്റ്റർ ചെയ്തിരിക്കുന്നത്.
കൊല്ലുമെന്നും സൂററ്റിൽ ജീവിക്കണോ വേണ്ടയോ എന്ന് ഉൾപ്പെടെയുളള ഭീഷണികളാണ് ഇൻസ്റ്റഗ്രാമിലൂടെ ലഭിച്ചിരുന്നത്. സമാധാനലംഘനത്തിന് പ്രകോപനം നടത്തിയതിന് ഐപിസി സെക്ഷൻ 504, 506, 507 എന്നീ വകുപ്പുകൾ പ്രകാരമാണ് കേസ് എടുത്തിരിക്കുന്നത്.
